ৰহা, 10 অক্টোবৰ : ৰহা থানাৰ অন্তৰ্গত ফুলগুৰিত শনিবাৰে বিয়লি দুৰ্ঘটনাত পতিত হয় প্ৰাক্তন মন্ত্ৰী তথা চামগুৰিৰ বিধায়ক ৰকিবুল হুছেইন। আজি বিয়লি ৩৭ নং ৰাষ্ট্ৰীয় ঘাই পথেৰে নগাঁৱৰ পৰা গুৱাহাটী অভিমুখে গৈ থকা অৱস্থাত সংঘটিত হয় এই দুৰ্ঘটনা । জানিব পৰা মতে, কংগ্ৰেছ নেতাজনে নিজৰ এ এচ ০১ বি জেড ০৭৮৬ (AS-01BZ-0786)নম্বৰৰ ইন'ভা গাড়ীখনেৰে গুৱাহাটীলৈ অভিমুখে গৈ থকা অৱস্থাত ৰহাৰ ফুলগুৰিত হঠাতে ৩৭নং ৰাষ্ট্ৰীয় ঘাইপথৰ ওপৰেৰে পাৰ হোৱা এটা গৰুক খুন্দা মাৰে ৷ যাৰ ফলতেই সংঘটিত হৈছে এই দুৰ্ঘটনাটো ৷ দুৰ্ঘটনাটোত ভৰিত আঘাত পাইছে ৰকিবুল হুছেইনে।
আনহাতে চালক মইনুল হকৰ আঘাত গুৰুত্বৰ বুলি জানিব পৰা গৈছে। ঘটনা সংঘটিত হোৱাৰ কিছু সময়ৰ পিচতে সেই ঠাইত উপস্থিত হয় সাংসদ গৌৰৱ গগৈ আৰু গৌৰৱ গগৈৰ গাড়ীতে ৰকিবুল হুছেইন গুৱাহাটীলৈ অভিমুখে ৰাওনা হয় আনহাতে গুৰুতৰভাৱে আহত হোৱা চালক মইনুলক নগাঁৱৰ চিকিৎসালয়ত ভৰ্তি কৰোৱা হৈছে। দুৰ্ঘটনাটো ইমানেই ভয়ংকৰ আছিল যে ৰকিবুল হুছেইনৰ বাহনৰ সন্মুখভাগ চুৰমাৰ হৈ পৰে। গাড়ীৰ খুন্দাত গৰুটোও থিতাতে নিহত হয়। ইতিমধ্যে ৰহা আৰক্ষীয়ে ঘটনাস্থলীত উপস্থিত হৈ দুৰ্ঘটনাগ্ৰস্ত বাহনখন উদ্ধাৰ কৰিছে ৷
লগতে পঢ়ক : বদৰুদ্দিন আজমলে বিচাৰিলেই কংগ্ৰেছে এৰি নিদিয়ে বৰপেটাৰ পাঁচখন আসন
