নগাঁও, 18 জানুৱাৰী : এজাক অনাথ শিশুৰ কলৰৱত মুখৰিত হ'ল কলঙৰ বাকৰি নেহৰুবালি । পখিলা খেদা বয়সতেই যেন জীৱনৰ সকলো ৰং হেৰুৱাই পেলাইছিল এইজাক শিশু, কিশোৰ, কিশোৰীয়ে । বৰ্তমান তেওঁলোকৰ স্থায়ী ঠিকনা নগাঁৱৰ অনাথ আশ্ৰম । বিহু, পূজা আদি সকলো উৎসৱেই উদযাপন কৰে অনাথ আশ্ৰমৰ চাৰিবেৰৰ মাজত ।
হয়তো তেওঁলোকৰো মন যায় আশ্ৰমৰ চাৰিবেৰ অতিক্ৰমী আন শিশুসকলৰ দৰে ওমলিবলৈ, তেওঁলোকৰো হয়তো মন যায় বাহিৰত ঘূৰি ফুৰি আনন্দ উৎসৱ উপভোগ কৰিবলৈ । কিন্তু সেই সকলোবোৰ যেন কেৱল এক সপোনহে তেওঁলোকৰ বাবে । বুধবাৰে বিয়লি হঠাৎ নগাঁৱৰ কলঙৰ বাকৰি নেহৰুবালিত চলি থকা ভোগালী উৎসৱত কিছু সময়ৰ বাবে হ’লেও তেওঁলোকে নিজকে বিলীন কৰিলে ৰং-ৰহইচৰ মাজত ৷
এয়া কেৱল সম্ভৱ হৈছে নগাঁও সদৰ সমষ্টিৰ বিধায়ক তথা নগাঁও ভোগালী উৎসৱৰ কাৰ্যকৰী সভাপতি ৰূপক শৰ্মাৰ মহানুভৱতাৰ বাবেই । বিধায়ক ৰূপক শৰ্মাই নিজ পৰিয়ালৰ সৈতে ভোগালী উৎসৱ উপভোগ কৰাৰ উপৰিও বুধবাৰে বিয়লি নিজকে ব্যস্ত ৰাখিলে এইসকল শিশু, কিশোৰ-কিশোৰীৰ সৈতে ।