তেজপুৰ কেন্দ্ৰীয় কাৰাগাৰাত মৃত্যু কাৰাৰুদ্ধ সন্দেহজনক বাংলাদেশীৰঃ উত্তপ্ত কলিয়াবৰ

তেজপুৰ কেন্দ্ৰীয় কাৰাগাৰাত এগৰাকী লোকৰ মৃত্যুক কেন্দ্ৰ কৰি উত্তপ্ত পৰিস্থিতি কলিয়াবৰৰ পূৱ-শুৱালনী অঞ্চলত ৷ ঘটনাস্থলীত মোতায়েন আৰক্ষী তথা অৰ্ধ-সামৰিক বাহিনীৰ লোক ৷

কলিয়াবৰ, 12 মে' : তেজপুৰ কেন্দ্ৰীয় কাৰাগাৰাত এগৰাকী লোকৰ মৃত্যুক লৈ উত্তপ্ত পৰিস্থিতি কলিয়াবৰৰ পূৱ-শুৱালনী অঞ্চলত ৷ বাংলাদেশীৰ সন্দেহত প্ৰায় চাৰিবছৰ পূৰ্বে কলিয়াবৰ মহকুমা প্ৰশাসনে গ্ৰেপ্তাৰ কৰি তেজপুৰ কেন্দ্ৰীয় কাৰাগাৰলৈ প্ৰেৰণ কৰা বাসুদেৱ বিশ্বাস নামৰ লোকজনৰ মৃত্যুক লৈ দেওবাৰে অঞ্চলটোত সৃষ্টি হয় উত্তপ্ত পৰিস্থিতিৰ ৷ 1947 চনৰ উপযুক্ত নথি-পত্ৰৰ লগতে 1966 চনৰ ভোটাৰ তালিকাত নাম থকাৰ পাচতো লোকজনক কাৰাগাৰত ৰাখি বাংলাদেশীৰ নামত হাৰাশাস্তি কৰি অহাৰ অভিযোগ মৃত লোকজনৰ পৰিয়ালৰ ৷

ইপিনে গোচৰ চলি থকা অৱস্থাতে শনিবাৰে বাসুদেৱৰ আকস্মিক মৃত্যু হোৱাৰ পাচত আৰক্ষীয়ে দেওবাৰে বিয়লি মৃতদেহ পৰিয়ালৰ লোকক চমজি দিবলৈ আহি সন্মুখীন হয় আহুকলীয়া পৰিস্থিতিৰ । স্থানীয় ৰাইজে মৃতদেহ চমজি ল'বলৈ অস্বীকাৰ কৰাৰ লগতে অঞ্চলটোৰ পৰা বাংলাদেশীৰ সন্দেহত গ্ৰেপ্তাৰ কৰি নিয়া আনকেইগৰাকী গঞাক বিনা চৰ্তে মুক্তি দিয়াৰ দাবী তোলে । আনহাতে কাৰাগাৰত মৃত্যু হোৱা বাসুদেৱ বিশ্বাস পৰিয়ালক 20 লাখ টকাৰ ক্ষতিপূৰণৰো দাবী তোলে স্থানীয় ৰাইজে ৷ ঘটনাক কেন্দ্ৰ কৰি অঞ্চলটোৰ পৰিস্থিতি অধিক উত্তপ্ত হৈ পৰাত কলিয়াবৰ মহকুমা প্ৰশাসনে ঘটনাস্থলীত মোতায়েন কৰে আৰক্ষী তথা অৰ্ধ-সামৰিক বাহিনীৰ লোক ।