নগাঁও, 7 অক্টোম্বৰ : বানত পৰি জীৱন বিপন্ন হোৱা একাংশ লোক৷ দহ বছৰে কটাইছে দুৰ্বিষহ জীৱন ৷ একালৰ মহাজন এতিয়া হাজিৰা শ্ৰমিক ৷ আধাপেটীকৈ পাৰ কৰিছে দিন ৷ থাকিবলৈ ঘৰ নথকাত মথাউৰিত ছালি দি গৰু-ছাগলীৰ সৈতে কৰিছে সহাৱস্থান ৷ এইসকল লোকৰ দুৰ্দৰ্শাৰ অন্যতম কাৰণ হ’ল ৰাজনীতি ৷ তেওঁলোকক লৈ খেলা হৈছে ৰাজনীতি খেল ৷ কংগ্ৰেছৰ মতে,তেওঁলোক বিজেপি আৰু বিজেপিৰ মতে,তেওঁলোক কংগ্ৰেছী বিধায়কৰ সমষ্টিৰ ৷ দুয়োটা দলেই আদৰি ল’ব নোখোজে এই ভাষিক সংখ্যালঘু সকলক ৷
অসমৰ এটা গুৰুত্বপূৰ্ণ সমষ্টিৰ এইয়া বাস্তৱ কাহিনী ৷ কংগ্ৰেছৰ তিনিটাকৈ কাৰ্যকালত গুৰুত্বপূৰ্ণ বিভাগৰ মন্ত্ৰীত্ব লাভ কৰিছিল সমষ্টিটোৰ প্ৰতিনিধিগৰাকীয়ে ৷ এই সমষ্টিটো হ’ল 88 নং চামগুৰি সমষ্টি আৰু ইয়াৰ প্ৰতিনিধিত্ব কৰি আহিছে 2001 চনৰ পৰা বৰ্তমানলৈ প্ৰাক্তন মন্ত্ৰী ৰকিবুল হুছেইনে ৷ এই চামগুৰি সমষ্টিৰে লাওখোৱাৰ ৩ নং ভূৰবন্ধাত দহ বছৰে নৰক যন্ত্ৰণাৰ মাজত দিন কটাব লগীয়া হৈছে শতাধিক ভাষিক সংখ্যালঘু পৰিয়ালে ৷ ৰাজ্যৰ আন ঠাইৰ লগতে বানে ধুই যায় চামগুৰি সমষ্টিৰো বহু অংশ ৷ বান আহে বান যায় ৷ বানৰ পৰা বাচিবলৈ মথাউৰিত উঠা মানুহবোৰ আকৌ নিজৰ ঠাইলৈ ঘূৰি যায় ৷ কিন্তু ব্যতিক্ৰম এইসকল লোক ৷ বছৰি বান আহিছে-গৈছে কিন্তু তেওঁলোক এই মথাউৰিতে আছে৷ এবছৰ-দুবছৰ নহয়,বিগত প্ৰায় দহটা বছৰ ৷
পূৰ্বতে একো একোজন চহকী কৃষক আছিল তেওঁলোক ৷ কিন্তু কালৰ কুটিল গতিত এতিয়া তেওঁলোকে অৱলম্বন কৰি ল’ব লগা হৈছে এই দুৰ্বিষহ জীৱন ৷ অঞ্চলটোৰ প্ৰায় গাতে লাগি থকা ব্ৰহ্মপুত্ৰ নদীৰ বুকুত জাহ গ’ল এওঁলোকৰ বহুতৰে ভেটি-মাটি ৷ সেইসময়ত সমষ্টিটোৰ বিধায়ক ৰকিবুল হুছেইন আছিল চৰকাৰৰ প্ৰৱল প্ৰতাপী মন্ত্ৰী ৷ কিন্তু তেওঁ কোনো ব্যৱস্থা নকৰিলে এই ভাষিক সংখ্যালঘু লোক সকলৰ পুনঃ সংস্থাপনৰ ৷
ৰাজনীতিৰ মেৰ পেচ নুবুজা এই লোকসকলক লৈ কৰা হৈছে কুটিল ৰাজনীতি ৷ ভাষিক সংখ্যালঘু হোৱা হেতুকেই এইসকল লোকক কংগ্ৰেছৰ দিনত সজোৱা হৈছিল বিজেপি সমৰ্থক ৷ প্ৰদান কৰা নহ’ল কোনো চৰকাৰী সা-সুবিধা ৷ 2016 চনত কংগ্ৰেছৰ তিনিটা কাৰ্যকালৰ শাসনৰ অৱসান ঘটাই দিছপুৰৰ ৰাজপাটত উঠিল বিজেপি ৷ প্ৰতিশ্ৰুতি দিছিল পৰিৱৰ্তনৰ ৷ কিন্তু পৰিৱৰ্তন নহ’ল এইসকল লোকৰ জীৱন পৰিক্ৰমা ৷ কংগ্ৰেছে বিজেপি সমৰ্থক বুলি অৱহেলা কৰা এই ভাষিক সংখ্যালঘু লোকসকলক বিজেপি চৰকাৰেও নেদেখুৱালে সামান্যতমো সহানুভূতি ৷ ৰাজনীতিৰ নামত খেলৰ সামগ্ৰী হৈ থাকি ৰ’ল এই লোকসকল ৷
লগতে পঢ়ক : বিজেপিৰ বিৰুদ্ধে অভিনৱ প্ৰতিবাদ যুৱ কংগ্ৰেছৰ
