নগাঁও, 20 ফেব্ৰুৱাৰীঃ চিপ লোৱা অৱস্থাত বিদ্যালয়তে নগাঁৱৰ নৱৰূপ জাতীয় বিদ্যালয়ৰ ছাত্ৰৰ মৃতদেহ উদ্ধাৰক লৈ প্ৰতিক্ৰিয়া অব্যাহত নগাঁৱত ৷ শনিবাৰে বিদ্যালয়ত পাঠদান চলি থকা সময়তে বিদ্যালয়খনৰ পঞ্চম মহলাত ডিঙিত চিপ লোৱা অৱস্থাত উদ্ধাৰ হৈছিল দশম শ্ৰেণীৰ ছাত্ৰ দিগন্ত বৰাৰ মৃতদেহ ৷ বিদ্যালয়খনৰ স্বত্বাধিকাৰী তথা সম্পাদক মুনীন্দ্ৰ শইকীয়াৰ বিৰুদ্ধে ছাত্ৰগৰাকীক নিৰ্যাতন চলোৱাৰ অভিযোগ উত্থাপন কৰি, শনিবাৰে উৰিয়াগাঁৱত ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰিছিল স্থানীয় ৰাইজে ৷ ঘটনাৰ উচিত তদন্ত কৰি দোষীক শাস্তি প্ৰদানৰ দাবীত সোমবাৰে বিদ্যালয়ৰ সন্মুখতো সাব্যস্ত কৰিছিল প্ৰতিবাদ ৷
পৰিয়ালৰ লোকে দাখিল কৰা এজাহাৰৰ ভিত্তিত আৰক্ষীয়ে ভাৰতীয় দণ্ডবিধিৰ ৩০২ ধাৰাৰ অধীনত গোচৰ ৰুজু কৰি তদন্ত অব্যাহত ৰাখিছে যদিও, এই পৰ্যন্ত আটক হোৱা নাই অভিযুক্ত মুনীন্দ্ৰ শইকীয়া ৷ মেধাবী ছাত্ৰ দিগন্ত বৰাক হত্যাৰ অভিযোগ উত্থাপন কৰি মানৱ অধিকাৰ আয়োগত গোচৰ তৰিছে কৃষক শ্ৰমিক উন্নয়ন পৰিষদেও ৷ ব্যক্তিগত খণ্ডৰ বিদ্যালয়খনত দুগৰাকীকৈ চৰকাৰী মহাবিদ্যালয়ৰ প্ৰবক্তা জড়িত থকাৰো গুৰুতৰ অভিযোগ উত্থাপন কৰিছে সংগঠনটোৱে ৷
লগতে পঢ়কঃ ৰাষ্ট্ৰদ্ৰোহৰ গোচৰত আজি অসমলৈ অনা হ’ব ছাৰ্জীল ইমামক
