নগাঁও, 12 জানুৱাৰীঃ নগাঁৱৰ নেহেৰুৱালীত ১৪ জানুৱাৰীৰ পৰা চাৰিদিনীয়া কাৰ্যসূচীৰে অনুষ্ঠিত হ'ব ১০৭ বছৰীয়া নগাঁও ভোগালী উৎসৱ৷ দেওবাৰে সংবাদ মেল সম্বোধন কৰি এই কথা সদৰী কৰিলে ভোগালী উৎসৱ সমিতিৰ কাৰ্য্যকৰী সভাপতি তথা বিধায়ক ৰূপক শৰ্মাই । সংবাদ মেলত নগাঁও চহৰৰ দহগৰাকীকৈ জ্যেষ্ঠ ব্যক্তিয়ে মঞ্চ ভোগালী বিহুৰ বাটকটীয়া নগাঁও ভোগালী উৎসৱৰ মেজি প্ৰজ্বলন কৰিব বুলিও উল্লেখ কৰে ৷
আনহাতে, উৰুকাৰ সন্ধিয়া নেহেৰুৱালীত নিৰ্মাণ কৰা ভেলাঘৰত নাম প্ৰসংগৰে আৰম্ভ হ'বলগীয়া ভোগালী উৎসৱত নগাঁও ভোগালী বিহুৰ পৰম্পৰা অনুসৰি 200 জ্যেষ্ঠ নাগৰিকক শ্ৰদ্ধা জ্ঞাপন কৰা হ'ব । লগতে জিলা উপায়ুক্ত যাদৱ শইকীয়াই ভোগালী উৎসৱৰ লগত সংগতি ৰাখি প্ৰদৰ্শনী আৰু আত্মসহায়ক গোটৰ বিপনী মুকলি কৰিব বুলিও জানিবলৈ দিয়ে ।
উল্লেখ্য যে, চাৰিদিনীয়াকৈ অনুষ্ঠিত হ'বলগীয়া ভোগালী উৎসৱত বিভিন্ন খেল, ধেমালি, কুইজ, চিত্ৰাংকন, ভূপেন্দ্ৰ সংগীত, ৰাভা সংগীতৰ লগতে মহিলাৰ পিঠাপনা প্ৰতিযোগিতাও অনুষ্ঠিত হ'ব । প্ৰতি বছৰেই বিভিন্ন জাতি ধৰ্মৰ লোকে অংশগ্ৰহণ কৰা শতবর্ষ গৰকা এই ভোগালী উৎসৱত এইবাৰো ৰাইজৰ অংশগ্ৰহণ কামনা কৰিছে উদযাপন সমিতিয়ে । ১৯১৩ চনৰ পৰা অনুষ্ঠিত হৈ অহা নগাঁও ভোগালী উৎসৱেই প্ৰথম মঞ্চ ভোগালী বিহু বুলিও দাবী জনাই উদযাপন সমিতিয়ে ।
