কলিয়াবৰ, 3 জুলাই : সাংসদ গৌৰৱ গগৈয়ে (Gaurav Gogoi) পৰিদৰ্শন কৰে কলিয়াবৰৰ চাৰিখন চিকিৎসালয় । চিমনা বস্তি, পানীগাঁও, উলুৱনী আৰু জখলাবন্ধা চিকিৎসালয় পৰিদৰ্শন কৰি স্বাস্থ্য মন্ত্ৰী কেশৱ মহন্তৰ গৃহ সমষ্টিৰ ক'ভিড পৰিস্থিতিৰ বিষয়ে বুজ লয় । চৰকাৰে বান্ধি দিয়া মতে, দহ দিনত 30 লাখ ক'ভিডৰ টীকাকৰণৰ লক্ষ্যত উপনীত হ'ব নোৱাৰাত সমালোচনাৰ সন্মুখীন হৈ পৰে সাংসদগৰাকী । আনকি স্বাস্থ্যমন্ত্ৰীৰ নিজ সমষ্টিতে টীকাকৰণত ব্যৰ্থ হৈছে বুলি অভিযোগ তোলে সাংসদগৰাকীয়ে । প্ৰতিষেধক টিকা ল'বলৈ যিদৰে ওলাই আহি শাৰী পাতিছে, চৰকাৰে কিন্তু পৰ্যাপ্ত পৰিমাণৰ প্ৰতিষেধকৰ ব্যৱস্থা কৰিব নোৱাৰাত সংক্ৰমণৰ সংখ্যা বৃদ্ধি হৈছে বুলি সন্দেহ প্ৰকাশ কৰে ।
আনহাতে, বিধায়ক অখিল গগৈৰ মুক্তিৰ বিষয়তো গুৰুত্বপূৰ্ণ মন্তব্য প্ৰকাশ কৰি কয় যে, বৰ্তমানৰ এই চৰকাৰখনে প্ৰতিবাদৰ গণতান্ত্ৰিক অধিকাৰ খৰ্ব কৰি অখিল গগৈৰ লগতে আন বহুতকে অন্যায়ভাৱে বন্দী কৰি ৰাখিছিল । দীৰ্ঘদিন ধৰি এই ব্যক্তিসকলক বন্দী কৰি চৰকাৰৰ বিৰুদ্ধে মাত মতা কণ্ঠক দমন কৰাতো সম্ভৱ নহয় । কিন্তু ভৱিষ্যতে এই চৰকাৰে প্ৰতিবাদী কণ্ঠ ৰোধ কৰিবলৈ ব্যাপক ৰূপত অৱতীৰ্ণ হোৱাৰ প্ৰয়াস কৰিব যিটো আমি প্ৰতিৰোধ কৰিব লাগিব বুলি মন্তব্য কৰে সাংসদগৰাকীয়ে ৷
ৰাজ্যত অব্যাহত আছে ক’ভিডৰ (Covid) সংক্ৰমণ । বিগত কিছুদিন ধৰি প্ৰায় একেই অৱস্থাত আছে সংক্ৰমণৰ হাৰ । অৱশ্যে ৰাজ্যিক ভিত্তিত আক্ৰান্তৰ হাৰ প্ৰায় একেই থাকিলেও জিলা ভিত্তিত যথেষ্ট তাৰতম্য হোৱা পৰিলক্ষিত হৈছে ।
বিগত কিছুদিন ধৰি ৰাজ্যত ক'ভিড আক্ৰান্তৰ হাৰ 1.50 শতাংশৰ পৰা 3 শতাংশৰ ভিতৰত আছে যদিও বিভিন্ন জিলাত আক্ৰান্তৰ হাৰ 10 শতাংশৰো বেছি হৈছে । আনহাতে এতিয়ালৈকে ৰাজ্যৰ 74,39,098 গৰাকী লোকে ভেকচিন (Vaccine) লাভ কৰিবলৈ সক্ষম হৈছে । ইয়াৰে 61,63,655 গৰাকী লোকে প্ৰথম পালি (First dose) আৰু 12,75,443 গৰাকী লোকে দ্বিতীয় পালি (Second dose) ভেকচিন লাভ কৰিছে । চৰকাৰী তথ্য মতে বিগত 24 ঘণ্টাত ৰাজ্যৰ 2,31,520 গৰাকী লোকক ভেকচিন প্ৰদান কৰা হৈছে আৰু চৰকাৰৰ হাতত মজুত আছে 3,04,790 পালি ভেকচিন ।
লগতে পঢ়ক: অসম চাহ পৰিষদৰ নতুন তত্বাৱধায়ক হিচাপে নিযুক্তি পোনাকণ বৰুৱা
