বঢ়মপুৰ,7 ডিচেম্বৰঃ গুৱাহাটী দূৰদৰ্শনৰ ধাৰাবাহিক টেলিফিল্ম, তথ্যচিত্ৰ আৰু চুটি ছবি নিৰ্মাতা আৰু পৰিচালক মোলান লস্কৰৰ প্ৰথমখন পূৰ্ণদৈৰ্ঘ্যৰ বোলছবি 'অবলিভিয়ন জয়া '৷ এই ছবিখনৰ বাবে মোলান লস্কৰে লাভ কৰিছে নেবকাছৰ শ্ৰেষ্ঠ চিত্ৰ নাট্য বঁটা ৷ কিন্তু উত্তৰ-পূৰ্বাঞ্চলৰ সাংস্কৃতিক সংগঠন 'নেবকাছে আগবঢ়োৱা (NEBCUS) ২০১৯বৰ্ষৰ এই শ্ৰেষ্ঠ চিত্ৰনাট্য বঁটা প্ৰত্যাখান কৰিছে সাহিত্যিক, সাংবাদিক তথা সাংস্কৃতিক কৰ্মীগৰাকীয়ে । নাগৰিকত্ব সংশোধনী বিধেয়কৰ বিৰোধিতাৰে এই সিদ্ধান্ত গ্ৰহণ কৰিছে মোলান লস্কৰে ৷
বঁটা প্ৰাপকে জানিবলৈ দিয়ামতে অহা ৯ ডিচেম্বৰত দিল্লীত এই বঁটা ৰাষ্ট্ৰীয়ভাৱে প্ৰদান কৰাৰ বাবে আমন্ত্ৰণ কৰিছিল মোলান লস্কৰক । অনুষ্ঠানত পূৰ্বাঞ্চলৰ সাহিত্য-ৰাজনৈতিক ক্ষেত্ৰৰ বহুকেইজন ব্যক্তিক বঁটা প্ৰদান কৰিব বুলি 'নেবকাছ'ৰ উদ্যোক্তাসকলে জানিবলৈ দিয়ে । উল্লেখ্য যে, ডিমাছা পাহাৰৰ বিখ্যাত স্বাধীনতা যুঁজাৰু জয়া থাউচেনৰ সংগ্ৰামভিত্তিক জীৱন কাহিনীৰ ওপৰত 'অবলিভিয়ন জয়া' নামৰ পূৰ্ণদৈৰ্ঘ্য বোলছবিখন নিৰ্মাণ কৰা হৈছে । ইতিমধ্যে সমাপ্ত হৈছে ডিমাছা ভাষাৰ প্ৰথমখন পূৰ্ণদৈৰ্ঘ্য বোলছবি 'অবলিভিয়ন জয়া' সম্পাদনাৰ কাম । উক্ত বোলছবিখন প্ৰযোজনা কৰিছে এন চি হিলছ স্বায়ত্তশাসিত পৰিষদে ।
