নগাঁও, 13 মে': ৰাষ্ট্ৰীয় নাগৰিক পঞ্জীৰ উন্নীতকৰণ প্ৰক্ৰিয়াৰ প্ৰতিবাদত এতিয়া উত্তাল হৈ পৰিছে ৰাজ্য ৷ নিতৌ পোহৰলৈ আহিছে এন আৰ চিৰ নামত সংঘটিত হাৰাশাস্তিৰ ন ন তথ্য ৷ আপত্তি-আবেদনৰ নামত প্ৰকৃত ভাৰতীয়ক হাৰাশাস্তি কৰাৰ গুৰুতৰ অভিযোগ উত্থাপন হৈছে এন আৰ চি কৰ্তৃপক্ষৰ বিৰুদ্ধে ৷ এন আৰ চিৰ একাংশ বিষয়া-কৰ্মচাৰীসকল ষড়যন্ত্ৰত জড়িত থকাৰ এক গুৰুতৰ অভিযোগ উত্থাপন হৈছে আৰু ইয়াকে লৈ সৰৱ হৈ উঠিছে ধিং সমষ্টিৰ বিধায়ক আমিনুল ইছলাম ।
সোমবাৰে বিধায়ক আমিনুল ইছলামৰ লগতে এআইইউডিএফ কৰ্মীয়ে এক বৃহৎ প্ৰতিবাদী সমদল উলিয়ায় ৷ ভূৱা আপত্তি আৰু বিষয়া কৰ্মচাৰীৰ পক্ষপাতিত্বমূলক আচৰণৰ লগতে এখন শুদ্ধ এন আৰ চি প্ৰস্তুতকৰণৰ দাবীত উলিওৱা হয় এই বিশাল প্ৰতিবাদী সমদল ৷ ধিং চহৰৰ মাজমজিয়াৰ পৰা উলিওৱা বিশাল প্ৰতিবাদী সমদলটো উত্তাল প্ৰতিবাদেৰে ৰাজহ চক্ৰ বিষয়াৰ কাৰ্যালয়ত উপস্থিত হয় । এন আৰ চি-ত সংঘটিত নানান বিসংগতিৰ বিৰুদ্ধে বিভিন্ন শ্ল'গানেৰে ধিং চক্ৰ বিষয়াৰ কাৰ্যালয় উত্তাল কৰি তোলাৰ লগতে এন আৰ চিত সংঘটিত খেলিমেলিৰ বিৰুদ্ধে ধিং চক্ৰ বিষয়াৰ জড়িয়তে এন আৰ চিৰ ৰাজ্যিক সমন্বয়ক প্ৰতীক হাজেলালৈ এখন ১১ দফীয়া স্মাৰকপত্ৰ প্ৰেৰণ কৰা হয় । এনআৰচিৰ ক্ষড়যন্ত্ৰৰ সৈতে জড়িত থকা চক্ৰ বিষয়াসকলক শাস্তিৰ দাবীত এই স্মাৰক পত্ৰ প্ৰেৰণ কৰে বিধায়কসহ এআইইউডিএফ কৰ্মীসকলে ৷
