কলিয়াবৰ, 28 এপ্ৰিল : বিশুদ্ধ পানী-পথৰ প্ৰতিশ্ৰুতিৰে নিৰ্বাচনী বৈতৰণী পাৰ হোৱা স্বাস্থ্যমন্ত্ৰীৰ গৃহ সমষ্টিতে এটুপি বিশুদ্ধ খোৱা পানীৰ বাবে হাহাকাৰ কৰিবলগীয়া হৈছে নাগৰিকে । স্বাধীনতাৰ 76 বছৰৰ পিচতো এটুপি বিশুদ্ধ খোৱাপানীৰ অভাৱত পাহাৰৰ জুৰিৰ পানীৰে তৃষ্ণা নিবাৰণ কৰিবলৈ বাধ্য হৈছে কলিয়াবৰ বাগৰিৰ 1 নং ৱাৰ্ডৰ বাসিন্দাসকলে । 89 নং কলিয়াবৰ বিধানসভা সমষ্টিৰ অন্তৰ্গত কলিয়াবৰৰ পূৱ প্ৰান্তত অৱস্থিত বাগৰিৰ 1 নং ৱাৰ্ডবাসীয়ে স্বাধীনতাৰ 76 বছৰৰ পিচতো চৰকাৰী আচঁনিয়ে আজিকোপতি ঢুকি নাপালে (Drinking water issue in Assam)।
কাজিৰঙা ৰাষ্ট্ৰীয় উদ্যানৰ দাঁতিকাষৰীয়া এই পাহৰীয়া অঞ্চলটোত নাই কোনো বিশুদ্ধ খোৱা পানীৰ ব্যৱস্থা । এটুপি খোৱা পানীৰ বাবেই এতিয়া চকুপানী টুকিবলগীয়া হৈছে ৱাৰ্ডটোৰ লোকসকলে । প্ৰায় এক কিলোমিটাৰ দূৰ খোজকাঢ়ি পাহাৰৰ কৰ্দযময় পানীৰেই তৃষ্ণা নিবাৰণ কৰিবলৈ বাধ্য হৈছে গাঁৱবাসীয়ে । চৰকাৰী জনস্বাস্থ্য কাৰিকৰী বিভাগৰ জল জীৱন আঁচনিও বগাহাতীত পৰিণত হোৱা পৰিলক্ষিত হৈছে অঞ্চলটোত । নামত আছে বিশুদ্ধ খোৱাপানী যোগানৰ পানীৰ টেপ । কিন্তু বিশুদ্ধ খোৱাপানী নোলায় পানী টেপটোৰ পৰা (Lack of drinking water) ।
স্বাধীনতাৰ 76 বছৰৰ পিচতো চৰকাৰৰ বিয়াগোম আঁচনিয়ে আজিকোপটি ঢুকি নোপোৱা গাঁওবাসীয়ে প্ৰতিদিনেই পাহাৰৰ পৰা নামনিলৈ বৈ অহা জুৰিৰ পানী সেৱন কৰাৰ ফলত জেষ্ঠ-কনিষ্ঠ সকলোৱে বিভিন্ন বেমাৰত ভুগিবলগীয়া হৈছে । নিৰ্বাচনৰ আগেয়ে অঞ্চলটোত শীঘ্ৰে পানীৰ সমস্যা দূৰ কৰাৰ প্ৰতিশ্ৰুতি দিছিল যদিও সেয়া আজিও সেয়া সম্ভৱ হৈ নুঠিল । সেয়ে অনাগত দিনত ভোট বৰ্জনৰ সিদ্ধান্ত গ্ৰহণ কৰিছে গাওঁবাসীয়ে ।
উন্নয়নৰ শ্ল'গান গোৱা বিজেপি নেতৃত্বাধীন চৰকাৰ জয়ন্তমল্ল বৰুৱাৰ বিভাগৰ এই ফোঁপোলা স্বৰূপটো চকুত পৰিবনে চৰকাৰ তথা বিভাগীয় কৰ্তৃপক্ষৰ । গাঁৱবাসীয়ে লাভ কৰিবলৈ সক্ষম হ’বনে চৰকাৰৰ জল জীৱন আঁচনিৰ বিশুদ্ধ খোৱা পানী সেয়া অনাগত দিনতহে লক্ষণীয় হ’ব (Minister Jayanta Malla Baruah) ।
লগতে পঢ়ক : Loksabha Election 2024 : গণতন্ত্ৰ ৰক্ষাৰ স্বাৰ্থত বিজেপিক প্ৰতিহত কৰাই বিৰোধী শক্তিৰ মূল লক্ষ্য: ভূপেন বৰা
