কলিয়াবৰ, 25 জুন : শুকুৰবাৰে কলিয়াবৰত চুলাই মদসহ আটক এটা সৰবৰাহকাৰী ৷ কলিয়াবৰৰ নিজ-চিলাবন্ধা গাঁৱত ৰাইজে হাতে-লুটে কৰায়ত্ব কৰি আৰক্ষীক গতাই দিয়ে চুলাই-মদ সৰবৰাহকাৰীটোক ৷ উল্লেখযোগ্য যে, কলিয়াবৰৰ বেঙেনাআটিৰ পৰা সৰবৰাহকাৰীটোৱে আনিছিল প্ৰায় চল্লিশ লিটাৰ চুলাই-মদ । চুলাই-মদ লৈ আহি থকা অৱস্থাত নিজ-চিলাবন্ধা গাঁৱৰ মহিলা গাঁওৰক্ষী বাহিনীয়ে আটক কৰে যুৱকজনক ।
মনকৰিবলীয়া যে, বিগত কিছু দিনৰ পূৰ্ৱে কলিয়াবৰৰ ভিন্ন প্ৰান্তত আৰক্ষীয়ে অভিযান চলাই কেইবাটাও চুলাই ভাটি উচ্ছেদ কৰাৰ লগতে নষ্ট কৰিছিল কেইবাহাজাৰ লিটাৰ চুলাই-মদ । উল্লেখযোগ্য যে, অবৈধ চুলাই মদৰ বিৰুদ্ধে কলিয়াবৰ আবকাৰী বিভাগ যিদৰে সষ্টম হ’ব লাগিছিল কাৰ্যক্ষেত্ৰত এক ওলোটা ছবিহে দেখিবলৈ পোৱা গৈছে । যাৰ ফলত দিনক দিনে অঞ্চলটোত বৃদ্ধি পোৱা দেখা গৈছে চুলাই মদৰ সৰবৰাহ ৷ সম্প্ৰতি আবকাৰী বিভাগ (Excise department)ৰ এই নীৰৱ ভূমিকাক লৈ প্ৰশ্ন তুলিছে এতিয়া সচেতন মহলে ।
উল্লেখযোগ্য যে, মুখ্যমন্ত্ৰী ড৹ হিমন্ত বিশ্ব শৰ্মাই ড্ৰাগছমুক্ত অসম গঢ়াৰ কথা কোৱাৰ পাচতেই ৰাজ্যত তৎপৰ হৈছে আৰক্ষী ৷ প্ৰতিদিনে আৰক্ষীৰ কৱলত পৰিছে ড্ৰাগছ, নিচাজাতীয় সামগ্ৰীৰ লগতে সৰবৰাহকাৰী ৷ এই ক্ষেত্ৰত আৰক্ষীৰ লগতে ড্ৰাগছ আৰু নিচাজাতীয় সামগ্ৰী সৰবৰাহৰ বিৰুদ্ধে সজাগ হৈ উঠিছে সাধাৰণ জনতাও ৷
মনকৰিবলীয়া যে, শেহতীয়াভাৱে গঠিত চৰকাৰখনে শাসনভাৰ লোৱাৰ পাচত ব্যাপক ৰদবদল কৰিছিল প্ৰশাসনিক বিভাগত ৷ তেতিয়াৰে পৰা ৰাজ্যৰ জিলাসমূহত অপৰাধ তথা অবৈধ নিচাজাতীয় সামগ্ৰীৰ বিৰুদ্ধে অধিক তৎপৰ হৈ পৰিছে জিলা আৰক্ষী তথা প্ৰশাসন ৷ আৰক্ষীয়ে যিমানেই ড্ৰাগছ আৰু নিচাজাতীয় সামগ্ৰীৰ বিৰুদ্ধে অভিযান চলাই গৈছে সিমানেই প্ৰতিদিনে বিভিন্ন ধৰণৰ নতুন নতুন কৌশল প্ৰয়োগ কৰি ড্ৰাগছ আৰু নিচাজাতীয় সামগ্ৰীৰ সৰবৰাহ কৰি গৈছে সৰবৰাহকাৰীয়ে ৷
লগতে পঢ়কঃ পৌৰসভাৰ সভাপতি পদকলৈ বিজেপি-ইউপিপিএলৰ মাজত টনা-আঁজোৰা
