চামগুৰি,২ ছেপ্টেম্বৰ : নগাঁও জিলাৰ আমনিৰ এখন হকী ষ্টেডিয়াম (Hockey stadium in Amoni) এতিয়া পৰ্যবসিত হৈছে মদ, ভাং আৰু ড্ৰাগছৰ আড্ডাস্থলীলৈ । বিভিন্ন ধৰণৰ অসামাজিক কাৰ্যকলাপ চলে অৰ্ধনিৰ্মিত ষ্টেডিয়ামৰ পেভিলিয়ন আৰু গেলেৰিত । সকলো দেখিও নিমাত আৰক্ষী তথা প্ৰশাসন । আমলখি উচ্চ মাধ্যমিক বিদ্যালয়ৰ পিছফালে থকা ৰাজ্যখনৰ ভিতৰতে লেখত ল'বলগীয়া নিৰ্মিয়মান এই হকী ষ্টেডিয়ামখনত চলা অনৈতিক কাৰ্যকলাপে এতিয়া অতিষ্ঠ কৰি তুলিছে ৰাইজক ।
উল্লেখ্য যে গ্ৰামাঞ্চলৰ নতুন প্ৰজন্মক হকীৰ প্ৰতি আকৃষ্ট কৰাৰ উদ্দেশ্যেৰে ২০১৫ চনতে কেইবা কোটি টকা ব্যয় সাপেক্ষে নিৰ্মাণ আৰম্ভ কৰা হৈছিল এই হকী ষ্টেডিয়ামখনৰ । কিন্তু আজিলৈ ষ্টেডিয়ামখনৰ নিৰ্মাণ কাৰ্য সম্পূৰ্ণ হৈ নুঠিল । ৰহস্যজনক কাৰণত অৰ্ধনিৰ্মিত ষ্টেডিয়ামখন আজিলৈ তেনেকৈয়ে পৰি ৰ'ল । এতিয়া তাত হকী খেল খেলিবৰ বাবেও কোনো পৰিৱেশ নাই ।
কিন্তু সমীপৱৰ্তী বিদ্যালয়খনৰ ছাত্ৰ-ছাত্ৰীৰ লগতে শিক্ষক-শিক্ষয়িত্ৰীসকলৰ বাবে এতিয়া ষ্টেডিয়ামখন সুৰক্ষিত হৈ থকা নাই । কিয়নো বিদ্যালয়খনৰ প্ৰায় কাষতে লাগি থকা হাবি-জংঘলেৰে আৱৰি ধৰা অৰ্ধনিৰ্মিত পেভিলিয়নটো এতিয়া একাংশ নিচাসক্ত লোকৰ আড্ডাস্থলীত পৰিণত হৈছে (Illegal activities in Hockey stadium at Amoni)।
অসাধু চক্ৰটোৱে তাত ড্ৰাগছ, মদ, ভাং আৰু জুৱাৰ আড্ডা আৰম্ভ কৰিছে । যাৰ ফলত বিদ্যালয়খনৰ শৈক্ষিক পৰিৱেশ বহু পৰিমাণে নষ্ট হোৱাৰ অভিযোগ উঠিছে । চক্ৰটোৱে বিদ্যালয়খনত প্ৰায়ে লুটপাত চলাই আহিছে বুলিও অভিযোগ উঠিছে । কিন্তু এই ক্ষেত্ৰত আৰক্ষী আৰু প্ৰশাসনে আজিলৈ কোনো ব্যৱস্থা গ্ৰহণ কৰা নাই ।
কংগ্ৰেছৰ কাৰ্যকালত নিৰ্মাণ আৰম্ভ হোৱা হকী ষ্টেডিয়ামখনৰ কাম আজিলৈ সম্পূৰ্ণ নোহোৱাত সেই স্থান এতিয়া অসামাজিক কাৰ্যকলাপৰ ঘাটিত পৰিণত হৈছে । সেয়েহে এনে কাৰ্যকলাপ বন্ধ কৰাৰ ক্ষেত্ৰত আৰক্ষী তথা প্ৰশাসনক ব্যৱস্থা গ্ৰহণ কৰিবলৈ দাবী জনাইছে বিভিন্ন দল সংগঠনে । লগতে ষ্টেডিয়ামখনৰ কাম সম্পূৰ্ণ কৰি তাত ক্ৰীড়াৰ পৰিৱেশ গঢ়ি তুলিবলৈ অসম চাহ জনজাতি ছাত্ৰ সন্থাৰ বিষয়ববীয়াসকলে চৰকাৰক দাবী জনাইছে ।
লগতে পঢ়ক :ন্যায্য প্ৰাপ্তিৰ দাবীত ধলাগুৰি চাহ বগিছাত শ্ৰমিকৰ প্ৰতিবাদ
