নগাঁও,15 এপ্ৰিল: ৰঙালী বিহুৰ আনন্দ-উচাহৰ মাজতেই নগাঁৱৰ শিয়ালমাৰীত সংঘটিত হয় বিধ্বংসী অগ্নিকাণ্ড ৷ বৃহস্পতিবাৰে দুপৰীয়া সংঘটিত হোৱা অগ্নিকাণ্ডত পাঁচখনকৈ দোকান সম্পূৰ্ণৰূপে ভস্মীভূত হয় । এক বৃহৎ ব্যৱসায়িক এলেকাত হঠাৎ অগ্নিকাণ্ড সংঘটিত হোৱাত হাহাকাৰ লাগে অঞ্চলটোত ।
জানিব পৰা মতে, এই অগ্নিকাণ্ডত চাহৰ হোটেল, ফাৰ্মাচীসহ পাঁচখনকৈ দোকান জুইত জাহ যায় । অৱশ্যে পৰৱৰ্তী সময়ত স্থানীয় ৰাইজৰ সহযোগত অগ্নি নিৰ্বাপক বাহিনীয়ে জুই নিৰ্বাপন কৰিবলৈ সক্ষম হয় । এই অগ্নিকাণ্ড কেনেকৈ সংঘটিত হ’ল, সেয়া জানিব পৰা হোৱা নাই ৷ এখন হোটেলৰ পৰাই জুইৰ সূত্ৰপাত হোৱাৰ সন্দেহ কৰিছে স্থানীয় একাংশই ।
