নগাঁও, ৯ ছেপ্টেম্বৰ: ব্যতিক্ৰমী প্ৰতিবাদেৰে ৰাজ্যবাসীৰ দৃষ্টি আকৰ্ষণ কৰি আহিছে নগাঁৱৰ বিৰিঞ্চি বৰা নামৰ এগৰাকী সচেতন যুৱকে । কেতিয়াবা যদি মহাদেৱৰ ভাও লৈ মূল্যবৃদ্ধিৰ বিৰুদ্ধে সাব্যস্ত কৰে প্ৰতিবাদ, আন কেতিয়াবা নিযুক্তি বিক্ৰীৰ দোকান খুলি নিযুক্তি কেলেংকাৰীৰ বিৰুদ্ধে সাব্যস্ত কৰি আহিছে এনে প্ৰতিবাদ । এইবাৰ আকৌ নগাঁও চহৰৰ মাজমজিয়াতেই দেশ বিক্ৰী কেন্দ্ৰ খুলি প্ৰতীকী প্ৰতিবাদ সাব্যস্ত কৰে এইগৰাকী উচ্চ শিক্ষিত যুৱক বিৰিঞ্চি বৰাই ।
প্ৰায়েই ব্যতিক্ৰমী প্ৰতিবাদেৰে ৰাজ্যবাসীৰ দৃষ্টি আকৰ্ষণ কৰা নগাঁৱৰ সচেতন যুৱক বিৰিঞ্চি বৰাই এইবাৰ নগাঁও চহৰৰ মাজতেই দেশ বিক্ৰী কেন্দ্ৰ খুলি আন এক ব্যতিক্ৰমী প্ৰতিবাদেৰে দৃষ্টি আকৰ্ষণ কৰিছে নগাঁওবাসীৰ । আন দুগৰাকী যুৱকৰ সহযোগত মুখত প্ৰধানমন্ত্ৰী নৰেন্দ্ৰ মোডী,মুখ্যমন্ত্ৰী ড৹ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱালৰ মুখা পিন্ধি নগাঁও চহৰত প্ৰতীকী দেশ বিক্ৰী কেন্দ্ৰ খুলিছে । হাতত দগা পল্লা লৈ দাঙি ধৰিছে দেশৰ সম্পদ বিক্ৰী কৰাৰ ছবি ।
প্ৰধানমন্ত্ৰী নৰেন্দ্ৰ মোডী নেতৃত্বাধীন কেন্দ্ৰীয় চৰকাৰৰ লগতে মুখ্যমন্ত্ৰী ড৹হিমন্ত বিশ্ব শৰ্মা নেতৃত্বাধীন ৰাজ্য চৰকাৰৰ বিৰুদ্ধে দেশ তথা অসমৰ এপদ এপদ মূল্যবান সম্পদ বিক্ৰী কৰাৰ অভিযোগ উত্থাপন কৰি নগাঁও কলেজ পইণ্টত প্ৰতিবাদী কাৰ্যসূচী গ্ৰহণ কৰিছে বিৰিঞ্চি বৰাই । বিশেষকৈ অসমৰ ধুবুৰী আৰু পাণ্ডুঘাট উন্নীতকৰণ কৰি ব্যক্তিগত খণ্ডক গতাই দিয়াৰ বিৰোধিতা কৰিছে যুৱক তিনিজনে ।
ধুবুৰী আৰু পাণ্ডু ফেৰীঘাটৰ জৰিয়তে অসমৰ অৰ্থনীতি টনকিয়াল কৰাৰ বিপৰীতে ব্যক্তিগত খণ্ডক গতাই দিয়াৰ অভিযোগ উত্থাপন কৰিছে সচেতন যুৱক কেইজনে । ইপিনে, অসমতো এতিয়া মূল্যবান সম্পদ বিক্ৰীৰ লগতে নিযুক্তি আৰু দিৰ্নীতিৰ মুকলি বজাৰ চলি থকাৰো অভিযোগ উত্থাপন কৰিছে বিৰিঞ্চি বৰাই ।
