নগাঁও, 5 অক্টোবৰ: ভূমি দখলক কেন্দ্ৰ কৰি উত্তপ্ত পৰিস্থিতি নগাঁৱৰ এখন ব্যক্তিগত নাৰ্ছিং হোমত ৷ নগাঁও চহৰৰ ধিং গেটৰ এটা দলে শিলগুটি নিক্ষেপ কৰি ক্ষতিগ্ৰস্ত কৰে নাৰ্ছিং হোমখনৰ আচবাব আৰু কেইবাখনো বহন ৷ নগাঁও চহৰৰ হুজ বকুলতলস্থিত ডিউ কেয়াৰ নামৰ নাৰ্ছিংহোম খনত সোমবাৰে দুপৰীয়া সৃষ্টি হয় উত্তপ্ত পৰিস্থিতিৰ ৷ নাৰ্ছিং হোম খনৰ গাতে লাগি থকা এডোখৰ মাটিক কেন্দ্ৰ কৰি সৃষ্টি হয় উত্তপ্ত পৰিস্থিতিৰ ৷
নাৰ্ছিং হোম ডিউ কেয়াৰৰ স্বত্বাধিকাৰী ডাক্তৰ ফৰিদুল ইছলামে ক্ৰয় কৰা এবিঘা মাটি বলপূৰ্বকভাবে দখল কৰিবলৈ দলটোৱে চেষ্টা কৰা বুলি অভিযোগ উত্থাপন কৰিছে চিকিৎসকগৰাকীয়ে ৷ দলটোয়ে শিলগুটি নিক্ষেপ কৰি নাৰ্চিং হোম খনৰ ক্ষতিসাধন কৰাত হুৱাদুৱা লাগে চিকিৎসালয় খনত চিকিৎসাধীন ৰোগী আৰু আত্মীয়ৰ মাজত ৷ সেই ঘটনাত গুৰুতৰভাবে আহত হয় নাৰ্ছিং হোম খনৰ ৬ জনকৈ কৰ্মচাৰী ৷ পৰৱৰ্তী সময়ত ঘটনাস্থলীত নগাঁও আৰক্ষীৰ উচ্চপদস্থ বিষয়া উপস্থিত হৈ পৰিস্থিতি নিয়ন্ত্ৰণলৈ আনে ৷
