বঢ়মপুৰ, 31 মাৰ্চ : নগাঁৱৰ কামপুৰৰ ঘিলানীত এটা পুখুৰীক কেন্দ্ৰ কৰি দুখন গাঁৱৰ ৰাইজ লিপ্ত হয় তীব্ৰ সংঘাতত । দুই পক্ষৰ মাজত হোৱা এই সংঘাতত মহিলাসহ আহত হয় প্ৰায় 10জনকৈ লোক ৷ ঘটনাস্থলীত আৰক্ষী আৰু চি আৰ পি এফ বাহিনীৰ দল উপস্থিত হৈ পৰিস্থিতি নিয়ন্ত্ৰণৰ চেষ্টা কৰে যদিও বৰ্তমানেও অঞ্চলটোত বিৰাজ কৰি আছে চেপা উত্তেজনাই ।
ইপিনে আৰক্ষী বাহিনী উপস্থিত হৈ এই সংঘাতত আহত হোৱা আটাইকেইজনকে ততাতৈয়াকৈ প্ৰেৰণ কৰে কামপুৰ আৰু কঠিয়াতলী চিকিৎসালয়লৈ ৷ তথ্য অনুসৰি আদৰ্শ গাঁও আৰু ঘিলানী গাঁৱৰ মাজত থকা ৰাজহুৱা পুখুৰীটোক কেন্দ্ৰ কৰি ভিন্ন সময়ত দুয়োখন গাঁৱৰ মাজত সংঘাত হৈ অহাৰ লগতে এই সংঘাতে পাইছিল ন্যায়ালয়ৰ মজিয়া ৷ শেহতীয়াকৈ গুৱাহাটী উচ্চ ন্যায়ালয়ে পুখুৰীটো ঘিলানী গাঁৱৰ ৰাইজক চমজাইদিয়াত দেওবাৰে ঘিলানী গাঁৱৰ ৰাইজে পুখুৰী চাফা কৰি থকা অৱস্থাতে দুয়োখন গাঁৱৰ ৰাইজৰ মাজত সৃষ্টি হয় প্ৰচণ্ড সংঘাতৰ ৷
