নগাঁও,31 মেঃ এজন সাধাৰণ যুৱক ৷ নাম প্ৰণৱ দাস ৷ নগাঁৱৰ চামগুৰিৰ এইজন যুৱকে মুকলি প্ৰত্যাহ্বান জনাইছে এসময়ৰ প্ৰতাপী মন্ত্ৰী তথা বৰ্তমানৰ চামগুৰি সমষ্টিৰ বিধায়ক ৰকিবুল হুছেইনক ৷ ৰকিবুল হুছেইনক গড় হত্যাৰ মহানায়ক আখ্যা প্ৰণৱ দাসৰ ৷ যুৱকজনৰ সৈতেও বাকযুদ্ধত লিপ্ত হৈছে ৰকিবুল হুছেইন ৷
দুদিন পূৰ্বে চামগুৰিৰ বৰমাত একাংশ বিজেপি কৰ্মীয়ে আক্ৰমণ কৰিছিল বিধায়ক ৰকিবুল হুছেইন আৰু নুৰুল হুদাৰ বাহনত ৷ তাৰ পাচতেই নগাঁৱত সংবাদমেলৰ আয়োজন কৰি ৰকিবুল হুছেইনে প্ৰণৱ দাসৰ বিৰুদ্ধে তুলিছিল অভিযোগৰ আঙুলি ৷ ইয়াকে লৈ ক্ষুণ্ণ হৈ পৰে প্ৰণৱ দাস নামৰ যুৱকজন ৷ সংবাদমেলত প্ৰণৱ দাসৰ নাম লৈ সমালোচনা কৰা ৰকিবুল হুছেইনক প্ৰত্যাহ্বান জনালে প্ৰণৱ দাসে ৷ প্ৰণৱ দাসৰ দাবী এই আক্ৰমণৰ ঘটনাৰ সৈতে জড়িত নহয় তেওঁ ৷ অৱশ্যে, কিছুদিন পূৰ্বে চামগুৰিৰ এখন সভাত ৰকিবুল হুছেইনক চিয়াঁহী নিক্ষেপ কৰিছিল যুৱকজনে ৷ প্ৰণৱ দাসৰ দাবী, 2021ৰ নিৰ্বাচনত কৰ্মফল হাতে-হাতে পাব ৰকিবুল হুছেইনে ৷
