কলিয়াবৰ, ৫ নৱেম্বৰ : সমগ্ৰ ৰাজ্যৰ লগতে কলিয়াবৰতো পালন কৰা হয় সুধাকণ্ঠ ড৹ ভূপেন হাজৰিকাৰ দশম সংখ্যক মৃত্যু বাৰ্ষিকী । শিলঘাটৰ মহামিলনৰ তীৰ্থ মহাবাহুৰ তীৰত স্থাপিত সুধাকণ্ঠ স্মৃতি উদ্যানত পালন কৰা হয় শিল্পীগৰাকীৰ মৃত্যু দিৱস । এই বিশেষ দিনটোত তেওঁক স্মৰণ কৰাৰ উদ্দেশ্যে কলিয়াবৰত 'মানৱতা দিৱস' শীৰ্ষক বিশেষ কাৰ্যসূচী ৰূপায়ণ কৰা হয় ।
কলিয়াবৰ মহকুমা প্ৰশাসন, কলিয়াবৰ কেন্দ্ৰীয় ছাত্ৰ সন্থা, লেখিকা সমাৰোহ সমিতি, শাখা সাহিত্য সভা, কলিয়াবৰ প্ৰেছ ক্লাৱ আদি অনুষ্ঠানে সন্মিলিত প্ৰচেষ্টাৰে উদযাপন কৰে 'মানৱতা দিৱস'ৰ । মহান শিল্পীগৰাকীৰ প্ৰতিমূৰ্তিত শ্ৰদ্ধাঞ্জলি জ্ঞাপনৰ পাছতে শিল্পীগৰাকী অমৰ সৃষ্টিৰ জৰিয়তে তেওঁক স্মৰণ কৰা হয় ।
অনুষ্ঠানত ড৹ ভূপেন হাজৰিকাৰ গীতৰ চৰ্চাৰে প্ৰচাৰ-প্ৰসাৰত জড়িত হৈ থকা গায়ক তথা সুধাকণ্ঠৰ অনুৰাগী নয়নজ্যোতি শইকীয়াই গীতৰ জৰিয়তে মহান শিল্পীগৰাকীক স্মৰণ কৰে । অনুষ্ঠানত কেইবাগৰাকী বিশিষ্ট ব্যক্তি, সংগঠনসমূহৰ কৰ্মী লগতে স্থানীয় লোকসকল উপস্থিত থাকে ।
লগতে পঢ়ক : সুধাকণ্ঠৰ মৃত্যু বাৰ্ষিকী : তেজপুৰত শ্ৰদ্ধাঞ্জলি অনুষ্ঠান
