কলিয়াবৰ,15 জানুৱাৰী: ভোগালী বিহুৰ আনন্দ উল্লাসৰ মাজতে ৰাজ্যবাসীৰ বাবে এক সু-খবৰ ৷ 49 কোটি টকাৰ ব্যয় সাপেক্ষ কলিয়াবৰৰ বিহডুবিত নতুনকৈ আৰম্ভ হ’ব অসম সমবায় মৰাপাট কলৰ দ্বিতীয়টো গোট ৷ মাঘৰ 1 তাৰিখে পুৱাই অসম সমবায় মৰাপাট কলৰ দ্বিতীয়টো গোটৰ প্ৰস্তুতিৰ শুভাৰম্ভণি কৰে জলসম্পদ মন্ত্ৰী কেশৱ মহন্তই ৷ শুকুৰবাৰে পুৱাই বন্ধ হৈ থকা কলিয়াবৰৰ বিহডুবি পলিষ্টাৰ কল চৌহদত উপস্থিত হৈ নতুন গোটটোৰ প্ৰস্তুতি আনুষ্ঠানিকভাৱে শুভাৰম্ভণি কৰে মন্ত্ৰী গৰাকীয়ে ৷ প্ৰায় 22 বিঘা ভূমিত নতুনকৈ স্থাপন হ'ব নতুন গোটৰ মৰাপাট কলটো ৷ এই কথা প্ৰকাশ কৰিছে মন্ত্ৰী কেশৱ মহন্তই ৷
উল্লেখ্য যে,এই মাঘ মাহতে পঞ্চাশ বছৰত ভৰি দিয়া অসম সমবায় মৰাপাট কল শিলঘাটে,ৰাষ্ট্ৰীয় সমবায় বিকাশ নিগমৰৰ পৰা লাভ কৰা ৰাজ সাহাৰ্যযুক্ত ঋণ,কলটোৰ পৰা লাভ কৰা 9 কোটি টকা লাভাংশ আৰু আন উৎসৰ পৰা সংগৃহিত ধনেৰে নিৰ্মাণ হ'ব নতুন মৰাপাট কলটো ৷ আগন্তুক 3 মাহৰ ভিতৰত নতুন মৰাপাট কলটো সম্পূৰ্ণ হ’ব বুলি জানিবলৈ দিয়ে মন্ত্ৰী কেশৱ মহন্তই ৷ কলটো সম্পূৰ্ণ হৈ উঠিলে বহু নিবনুৱা যুৱকে কৰ্মসংস্থাপন লাভ কৰাৰ বাট মুকলি হ'ব বুলি জনাইছে মন্ত্ৰী গৰাকীয়ে ৷
লগতে পঢ়কঃ উজনিৰ 7 খন জিলাৰ বাবে ডিব্ৰুগড় পালেহি ক'ভিচিল্ড ভেকচিন
