নগাঁও,14 ডিচেম্বৰঃ অগপ কার্যলয়তে অগপ মন্ত্ৰীৰ মুর্দাবাদ ধ্বনি। দাবী উঠিল তিনি মন্ত্ৰীৰ পদত্যাগৰ। অগপ নেতৃত্বক দুমুখীয়া সাপ আখ্যা। নাগৰিকত্ব সংশোধনী আইনক সমৰ্থন কৰি এতিয়া তৃণমূল কৰ্মীৰ ৰোষত অগপ নেতৃত্ব ৷ অগপ নেতৃত্বৰ বিৰুদ্ধে তীব্ৰ বিষেদগাৰ আঞ্চলিক দলটোৰ নগাঁও জিলা সমিতিৰ। কেন্দ্ৰীয় নেতৃত্বৰ পদত্যাগৰ দাবীত শনিবাৰে নগাঁও জিলা অগপ কাৰ্যালয়ত অনুষ্ঠিত হয় জনসভা। এই জনসভাতে অগপ তিনি মন্ত্ৰী কেশৱ মহন্ত,অতুল বৰা আৰু ফণীভুষণ চৌধুৰী মুর্দাবাদ ধ্বনি দিয়ে। দলটোৰ তিনি মন্ত্ৰীৰ লগতে একমাত্ৰ ৰাজ্যসভাৰ সাংসদ বীৰেন্দ্ৰ প্ৰসাদ বৈশ্যক দুমুখীয়া সাপ আখ্যা দিয়ে কেন্দ্ৰীয় নেতৃত্বৰ বিৰুদ্ধে উদাত্ত ভাষণ প্ৰাক্তন মন্ত্ৰী তথা জ্যেষ্ঠ অগপ নেতা গিৰিন্দ্ৰ কুমাৰ বৰুৱাৰ। নাগৰিকত্ব সংশোধনী আইনৰ বিৰুদ্ধে অসম জ্বলি থকা সময়ত আঞ্চলিক দলৰ তিনি মন্ত্ৰী দিল্লীৰ অসম ভৱনত লাস-বিলাসত মত্ত থকা বুলি মত ব্যক্ত কৰে। নাগৰিত্ব সংশোধনী আইন বাতিলৰ লগতে কেন্দ্ৰীয় নেতৃত্বই পদত্যাগ কৰিবই লাগিব বুলি দাবী উত্থাপন কৰে।
তাৰোপৰি,নাগৰিকত্ব সংশোধনী আইনে অসমতে অসমীয়াক সংখ্যলঘুত পৰিণত কৰিব বুলিও মন্তব্য কৰি এই আইনে অসমীয়া ভাষা,সংস্কৃতি ধ্বংস কৰাৰ লগতে এই আইনে অসম চুক্তিক উলংগা কৰা বুলিও উল্লেখ কৰে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই । ছাত্ৰ সন্থাকে ধৰি বিভিন্ন গোটে ইতিমধ্যে উচ্চতম ন্যায়ালয়ৰ দ্বাৰস্থ হোৱাৰ কথাও উল্লেখ কৰি উচ্চতম ন্যায়ালয়ৰ পৰা অসমৰ ৰাইজে ন্যায় পাব বুলি আশাবাদী প্ৰফুল্ল কুমাৰ মহন্ত।
জনসভাত অগপ তিনি মন্ত্ৰীৰ বিৰুদ্ধে তীব্ৰ ক্ষোভ প্ৰকাশ কৰে দলটোৰ তৃণমূল কৰ্মীয়ে। সভাত নাগৰিকত্ব আইন সমৰ্থন কৰা অগপ নেতৃত্বক কাপুৰুষৰ আখ্যা দিয়াৰ লগতে কেবাটাও প্ৰস্তাৱ গ্ৰহণ কৰে।
