মৰিগাঁও , ২৭ মে': মৰিগাঁৱৰ 37 নং ৰাষ্ট্ৰীয় ঘাইপথত সোমবাৰে পুৱা ভয়ংকৰ পথ দুৰ্ঘটনা সংঘটিত হয় । একেটা স্থানতে তিনিখনকৈ ট্ৰাক দুৰ্ঘটনাত পতিত হয় ।
জানিব পৰা মতে, AS ০১ GC ২৮৪১ নম্বৰৰ এখন চিমেণ্ট ভৰ্তি ট্ৰাক সৰুপথাৰ অভিমুখে গৈ থকা পথত , আমচৈ গেটৰ সমীপত ট্ৰাক খনৰ চকা বিকল হৈ পৰে । তেনে সময়তে ট্ৰাক খনৰ চালকে ট্ৰাক খন মেৰামতি কৰি থকা সময়ত AS-০১-GC-৬৬৫৪ নম্বৰৰ এখন ট্ৰাকে মেৰামতিৰ বাবে ৰখাই থোৱা ট্ৰাক খনক পাচফালৰ পৰা খুন্দা মাৰে । ইপিনে দ্বিতীয় খন ট্ৰাকক আকৌ AS-০১-JC-৩৫৫৪ নম্বৰৰ এখন ট্ৰাকে পাচফালৰ পৰা খুন্দা মাৰে । প্ৰচণ্ড জোৰে খুন্দা মৰাৰ ফলত তৃতীয়খন ট্ৰাক পথৰ কাষত থকা ৰেলিঙৰ ওপৰত উঠি যায় ৷ আনহাতে দ্বিতীয় খন ট্ৰাকৰ সন্মুখভাগ ধ্বংস হয় ৷ ইপিনে এই দুৰ্ঘটনাটোৰ ফলত দুজন ট্ৰাক চালক গুৰুতৰভাৱে আঘাতপ্ৰাপ্ত হয় ৷ ইয়াৰে ভিতৰত এজনৰ অৱস্থা সংকটজনক বুলি জানিব পৰা গৈছে ৷ আহত লোক কেইজনক স্থানীয় চিকিৎসালয়ত ভৰ্তি কৰা হৈছে যদিও গুৰুতৰভাৱে আহত এজনক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হয় ৷
