মৰিগাঁও, 30 আগষ্ট : এন আৰ চিৰ সন্দৰ্ভত পুনৰ মন্ত্ৰী হিমন্ত বিশ্ব শৰ্মা আৰু বিজেপিৰ সভাপতি ৰঞ্জিত দাসৰ বিস্ফোৰণ ৷ অসমীয়া জাতিৰ দলিল অথবা অসমীয়াৰ ৰক্ষা কবচ হ'ব নোৱাৰে এন আৰ চি । এইখন এন আৰ চিক লৈ সপোন দেখা বাদ দিলোঁ বুলি মন্তব্য হিমন্ত বিশ্ব শৰ্মাৰ ।
শুকুৰবাৰে মৰিগাঁৱৰ এখন বিজেপিৰ সদস্য ভৰ্তি সভাত অংশ লৈ অসমৰ পৰা বিদেশী খেদাৰ বাবে দিল্লী-দিছপুৰত আলোচনা কৰিছো বুলিও কয় নেতাগৰাকীয়ে । 31 আগষ্টত প্ৰকাশ পাব লগীয়া চূড়ান্ত এন আৰ চি কোনো টেষ্ট অথবা ফাইনেল নহয়, আনকি কোৱাৰ্টাৰ ফাইনেলো নহয় বুলি ক'লে হিমন্ত বিশ্ব শৰ্মাই । প্ৰকাশ পাব লগীয়া এন আৰ চিৰ খচৰাত নাম থাকক বা নাথাকক কোনো বিদেশী অথবা স্বদেশী হৈ নাযায়, সেইয়া চূড়ান্ত কৰিব বিদেশী ন্যায়াধীকৰণেহে । ইয়াৰ বাবে ৰাজ্যত বিদেশী ন্যাধীকৰণৰ সংখ্যা বৃদ্ধি কৰা হৈছে বুলি মন্ত্ৰীগৰাকীয়ে জানিবলৈ দিয়ে ৷
ইয়াৰ লগতে এতিয়া সকলোকে শান্তি-শৃংখলাৰ মাজেৰে কালিলৈ দিনটো অতিবাহিত কৰাৰ আহ্বান হিমন্ত বিশ্ব শৰ্মাৰ । এই সভাতে 31 আগষ্টত প্ৰকাশ পাবলগীয়া এন আৰ চিৰ চূড়ান্ত খচৰাক লৈ প্ৰতিক্ৰিয়া ব্যক্ত কৰে বিজেপিৰ ৰাজ্যিক সভাপতি ৰণজিৎ কুমাৰ দাসে ৷
