ধিং,5 জানুৱাৰী: বিগত ২০১৮ চনত ধিং এক্সপ্ৰেছ হিচাপে খ্যাত হিমা দাসে এথেলেটিকছৰ বিশ্ব জুনিয়ৰ খিতাপ অৰ্জন কৰাৰ পিছতে জন সমুদ্ৰত পৰিণত হৈছিল ধিঙৰ কান্ধুলিমাৰীৰ হিমাৰ বাসগৃহ ৷ ৰাজ্যৰ মুখ্যমন্ত্ৰীকে ধৰি প্ৰায় সংখ্যক মন্ত্ৰী, বিধায়ক তথা প্ৰশাসনিক বিষয়াৰ আগমন ঘটিছিল কান্ধুলিমাৰী গাঁৱলৈ ৷ হিমাৰ গাঁৱখন সকলো প্ৰকাৰে উন্নয়ন কৰাৰ উদ্দেশ্যে বিভিন্ন আঁচনি প্ৰস্তুত কৰিছিল অসম চৰকাৰে ৷ ইয়াৰে অন্যতম আছিল সৌৰশক্তি চালিত ষ্ট্ৰীট লাইট স্থাপন কৰি গাঁৱখনত বিদ্যুতৰ মাধ্যমেৰে পোহৰাই তোলা ৷
উল্লেখ্য যে, আঁচনি অনুসৰিয়ে সেই বৰ্ষত চতুৰ্দশ বিত্তীয় আয়োগৰ ধনেৰে বটদ্ৰৱা উন্নয়ন খণ্ডই পথৰ দুয়োকাষে বিজুলী বাতিৰ খুঁটা স্থাপন কৰি পোহৰাই তোলে গাঁৱখন ৷ কিন্তু এই খুঁটা স্থাপনৰ কেইবামাহৰ পিছতে বিকল হৈ পৰাত এন্ধাৰত ডুব যায় কান্ধুলিমাৰী ৷ তাৰপিছৰে পৰা গাঁৱবাসীয়ে বিভাগীয় কৰ্তৃপক্ষৰ ওচৰত বিষয়টো সম্পৰ্কে অৱগত কৰে যদিও আজি পৰ্যন্ত বিভাগে গ্ৰহণ নকৰিলে কোনো ব্যৱস্থা ৷
লগতে চাওকঃ ধূলিৰ পৰা পৰিত্ৰাণ বিচাৰি কণ কণ শিক্ষাৰ্থীৰ প্ৰতিবাদ
