মৰিগাঁও, 15 নৱেম্বৰ: সমগ্ৰ ৰাজ্যৰ লগতে মৰিগাঁও জিলাৰ ভিন্ন প্ৰান্তত উদযাপিত হ'ল পোহৰৰ উৎসৱ দীপাৱলী ৷ সাধাৰণ ৰাইজৰ লগতে কৰ্মত নিয়োজিত সকলেও উদযাপন কৰিলে পোহৰৰ এই উৎসৱ ৷
মৰিগাঁও অগ্নি নিৰ্বাপক বাহিনীৰ কাৰ্যালয়ত জৰুৰী সেৱাত নিয়োজিত অগ্নি নিৰ্বাপক বাহিনীৰ জোৱানসকলে কলপুলি ৰুই , চাকি জলাই কাৰ্যালয় প্ৰাংগণত থকা মন্দিৰত সেৱা কৰি দীপাৱলীৰ উদযাপন কৰে। উল্লেখ্য যে দীপাৱলী উদযাপনৰ মাজতে জোৱানসকলৰ নিয়মীয়া বিভাগীয় গণনা কাৰ্যসূচীও ৰূপায়ন কৰা হয় ৷
জিলাখনৰ আৱৰ্ত ভৱনৰ চতুৰ্থ বৰ্গৰ কৰ্মচাৰী সকলে ৰং বিৰঙৰ বিজুলি বাতিৰে ভৱনৰ চৌহদ আলোকিত কৰি তোলে ৷ মৰিগাঁও আৱৰ্ত্ত ভৱনত কৰ্মৰত তিনি চতুৰ্থ বৰ্গৰ কৰ্মচাৰী ক্ৰমে দেৱ মেধি , ভবেন বৰা , সীমান্ত ডেকা আৰু এজন গৃহৰক্ষী জোৱানৰ প্ৰচেষ্টাত আৱৰ্ত ভৱনৰ চৌহদ উজ্বলি উঠে ।
ইফালে দীপাৱলী উদযাপনক লৈ প্ৰশাসনে জাৰি কৰা নিৰ্দেশাৱলী নামানি একাংশই উচ্চ শব্দ সম্পন্ন আতচবাজী ফুটোৱা পৰিলক্ষিত হ'ল ৷ মৰিগাঁৱৰ চহৰ তথা গ্ৰামাঞ্চল সকলোতে ৰাইজে একেই উচাহেৰে দীপাৱলী উদযাপন কৰা পৰিলক্ষিত হয় ৷
মৰিগাঁও চহৰৰ দৈনিক বজাৰৰ পূজা উদযাপন সমিতিৰ উদ্যোগতো দীপাৱলী উপলক্ষে অনুষ্ঠিত হোৱা পূজাৰ বেদীত ধূপ নৈবেদ্য আগবঢ়াই মা কালীৰ আশিস বিচাৰি ভকত বৈষ্ণৱ সকলে সোৱা লোৱা পৰিলক্ষিত হ'ল ৷
লগতে পঢ়ক : দীপাৱলীৰ শুভক্ষণত মংগলদৈত ৰংগোলী প্ৰতিযোগিতাৰ আয়োজন
