মৰিগাঁও,8 ডিচেম্বৰঃ আজি কৃষকৰ আহ্বানমৰ্মে দেশত পালন কৰা হৈছে ভাৰত বন্ধ ৷ 'কৃষি আইন 2020' বাতিলৰ দাবীত দেশজুৰি বন্ধৰ ঘোষণা কৰিছিল কৃষকসকলে ৷ ইতিমধ্যে কৃষকসকলে ঘোষণা কৰা ভাৰত বন্ধৰ প্ৰতি পূৰ্ণ সমৰ্থন আগবঢ়াইছে জনসাধাৰণৰ লগতে 22 টাকৈ বিৰোধী ৰাজনৈতিক দলেও ৷
উল্লেখ্য যে, দেশৰ ৰাজধানী দিল্লীত কৃষি আইনৰ বিৰুদ্ধে ইতিমধ্যে 13 টাকৈ দিন প্ৰতিবাদ সাব্যস্ত কৰিছে যদিও কৃষকসকলৰ প্ৰতিবাদৰ প্ৰতি বিজেপি চৰকাৰে কোনো সঁহাৰি নজনোৱাৰ অভিযোগ উত্থাপন হৈ আহিছে ৷ ফলত কৃষক সংগঠনসমূহে আজি ভাৰত বন্ধৰ ঘোষণা কৰিছিল ৷ কৃষকসকলৰ ভাৰত বন্ধৰ প্ৰতি সমগ্ৰ দেশৰ লগতে অসমতো বন্ধৰ সৰ্বাত্মক প্ৰভাৱ পৰা দেখা গৈছে ৷
সমান্তৰালকৈ ৰাজ্যৰ বিভিন্ন প্ৰান্তৰৰ লগতে মৰিগাঁৱতো ভাৰত বন্ধৰ প্ৰভাৱ পৰা দেখা গৈছে । মৰিগাঁও জিলাখনৰ সকলো ব্যৱসায়ী প্ৰতিষ্ঠান, যানবাহন চলাচল বন্ধ থাকে । ফলস্বৰূপে সম্পূৰ্ণ ব্যাহত হৈ পৰে সাধাৰণ জনজীৱন ৷
