মৰিগাঁও, ৩ অক্টোবৰ: মৰিগাঁও সদৰ থানাৰ সীমান্ত শাখাৰ কনিষ্টবল জয়ন্ত কুমাৰ দাসক তৎকালীনভাৱে নিলম্বন কৰিছে মৰিগাঁও জিলাৰ আৰক্ষী অধীক্ষক হেমন্ত কুমাৰ দাসে । মৰিগাঁও আৰক্ষী থানাৰ অন্তৰ্গত থানাগৰা গাঁৱৰ একাংশ সংখ্যালঘু লোকক বিদেশীৰ নামত হাতেলিখা ভুৱা জাননী দেখুৱাই ১০ ৰ পৰা ৪০ হাজাৰ টকা পৰ্যন্ত সংগ্ৰহ কৰাৰ অভিযোগ উত্থাপন হৈছিল কনিষ্টবল জয়ন্ত কুমাৰ দাসৰ লগতে দুজনকৈ গাঁওৰক্ষী বাহিনীৰ সম্পাদকৰ বিৰুদ্ধে ।
ভুক্তভোগীয়ে মৰিগাঁও আৰক্ষী অধীক্ষকক দিয়া লিখিত অভিযোগৰ লগতে ফোন কল আৰু ভিডিঅ' ৰেকৰ্ডিঙৰ ভিত্তিত আৰক্ষীয়ে নিলম্বন কৰিছে কনিষ্টবল জয়ন্ত কুমাৰ দাসক । যিসময়ত মুখ্যমন্ত্ৰী ড৹ হিমন্ত বিশ্ব শৰ্মাই অসম আৰক্ষীৰ সংস্কাৰৰ বাবে কেতবোৰ পদক্ষেপ লৈছে সেই সময়তে মৰিগাঁৱৰ সীমান্ত শাখাৰ আৰক্ষীৰ কাণ্ডই লজ্জানত কৰিছে বিভাগটোক ।
উত্থাপিত অভিযোগ মতে, দালালিত নামিছে মৰিগাঁও সদৰ থানাত কৰ্মৰত সীমান্ত শাখাৰ জয়ন্ত কুমাৰ দাস নামৰ আৰক্ষী কনিষ্টবলজন । সীমান্ত শাখাত কৰ্মৰত আৰক্ষী কনিষ্টবলজনৰ বিৰুদ্ধে দীৰ্ঘদিন উত্থাপিত হৈছে গুৰুত্বৰ অভিযোগ । দালালৰ সহায়ত গাঁও অঞ্চলৰ একাংশ লোকক বিদেশীৰ গোচৰ দেখুৱাই ভয় ভাবুকিৰে ধন সংগ্ৰহৰ গুৰুতৰ অভিযোগ উত্থাপন কৰিছে মৰিগাঁও আৰক্ষী থানাৰ অন্তৰ্গত থানাগড়াৰ এই সকল লোকে ।
আনহাতে,ভুক্তভোগী লোকসকলে এই ঘটনা সন্দৰ্ভত ন্যায় বিচাৰি মৰিগাঁও আৰক্ষী অধীক্ষকক লিখিত অভিযোগ উত্থাপন কৰাৰ পিছতে আৰক্ষী অধীক্ষক হেমন্ত কুমাৰ দাসে গ্ৰহণ কৰে এই শাস্তিমূলক ব্যৱস্থা । শূণ্য সহনশীলতাৰ কথা কোৱা অসম চৰকাৰ আৰু গৃহ বিভাগৰ দায়িত্বত থকা মুখ্যমন্ত্ৰী ড৹ হিমন্ত বিশ্ব শৰ্মাই এনে আৰক্ষীৰ লোকসকলক কি ব্যৱস্থা গ্ৰহণ কৰিব সেয়া সময়ত লক্ষণীয় হ'ব ।
