মৰিগাঁও, ১৩ আগষ্ট: বহু প্ৰতিবাদী কাৰ্যসূচী ৰূপায়ন, বহু আৰ্জি দাখিল, বহু আলোচনা-বিলোচনাৰ পিচতো মৰিগাঁও বিধানসভা সমষ্টিটো জনজাতিৰ বাবে সংৰক্ষণ নকৰাত প্ৰতবাদ মুখৰ হৈ পৰিছে তিৱা দল সংগঠনৰ নেতৃত্ব । ভাৰতৰ নিৰ্বাচন আয়োগে সমষ্টি নিৰ্ধাৰণৰ চূড়ান্ত খচৰা প্ৰকাশ কৰাৰ পিচতে প্ৰতিবাদ মুখৰ হৈ পৰিছে তিৱা সমাজ । আকৌ এলানি গণতান্ত্ৰিক আন্দোলনৰ ঘোষণা কৰিছে সদৌ তিৱা ছাত্ৰ সন্থাৰ নেতৃত্বই । এই সন্দৰ্ভত শনিবাৰে মৰিগাঁৱত সদৌ তিৱা ছাত্ৰ সন্থাই এক সংবাদমেলৰ আয়োজন কৰি উজাৰিলে ক্ষোভ ।
ৰাজ্যৰ আন আন বিধানসভা সমষ্টিৰ লেখীয়াকৈ মৰিগাঁৱতো সমষ্টি পুনৰ নিৰ্ধাৰণ সন্দৰ্ভত প্ৰতিবাদৰ আগজাননী দিলে সদৌ তিৱা ছাত্ৰ সন্থাই । কালি তিৱা ছাত্ৰ সন্থাৰ মুখ্য কাৰ্যালয়ত সদৌ তিৱা ছাত্ৰ সন্থাৰ সম্পাদক প্ৰশান্ত মছৰঙে তিৱাসকলক ৰাজনৈতিকভাৱে কৰা প্ৰতাৰণাৰ উচিত প্রত্যুত্তৰ যথা সময়ত তিৱা ৰাইজ আৰু তিৱা জাতীয় সংগঠনে বিজেপি দলক দিব বুলি সকীয়াই দিয়ে ।
তেওঁ কয় যে অসম চৰকাৰৰ মহাপ্ৰতাপী মন্ত্ৰী পীযুষ হাজৰীকাই তিৱা জাতিক প্ৰতাৰণা কৰিছে । ইয়াৰ ফলস্বৰূপে অনাগত দিনত অনুষ্ঠিত হ'ব লগা লোকসভা নিৰ্বাচনত তিৱা ৰাইজে বিজেপি চৰকাৰক উচিত প্রত্যুত্তৰ দিব বুলি চৰকাৰক সকীয়াই দিয়ে সদৌ তিৱা ছাত্ৰ সন্থাই ।
