মাজুলী, 3 জুলাই : মাজুলীত কেন্দ্ৰীয় মিচিং ভাষাৰ পকুৰ সন্থাই এক সংবাদমেলৰ আয়োজন কৰে ৷ অসমৰ খিলঞ্জীয়া ভূমিপুত্ৰ মিচিং সম্প্ৰদায়ৰ লোকসকল সদায়ে যে চৰকাৰী প্ৰতাৰণাৰ বলি হৈ আহিছে সেই সন্দৰ্ভত সংবাদ মেলখনত উল্লেখ কৰে সন্থাই ৷ বিশেষকৈ মিচিং জনজাতিৰ কেইবাটাও প্ৰধান দাবী পূৰণ কৰিবলৈ ৰাজ্য চৰকাৰখনক অনুৰোধ কৰি অহাৰ পিচতো বিষয়টো সন্দৰ্ভত গুৰুত্ব প্ৰদান নকৰাত সংবাদ মেলত ক্ষোভ উজাৰে সন্থাই ।
চলিত বৰ্ষৰ 28, 29 আৰু 30 মে’ৰ দিনা গোগামুখত আগম কেবাঙৰ 50 বছৰীয়া সোণালী জয়ন্তী কাৰ্যসূচীত অসম চৰকাৰৰ মুখ্যমন্ত্ৰী ড৹ হিমন্ত বিশ্ব শৰ্মাই প্ৰাথমিক বিদ্যালয়ত প্ৰথম শ্ৰেণীৰ পৰা পঞ্চম শ্ৰেণীলৈ মাতৃভাষাৰ মাধ্যম ঘোষণা কৰি মুঠ 11 খনকৈ মিচিং ভাষাৰ পাঠ্যপুথি উন্মোচিত কৰিছিল । কিন্তু পৰিতাপৰ বিষয় যে, আজিলৈকে ভাষাটোক ৰাজ্যপালৰ স্বাক্ষৰৰ জৰিয়তে কেবিনেটযোগে গৃহীত কৰাৰ ক্ষেত্ৰত ব্যৱস্থা গ্ৰহণ কৰা পৰিলক্ষিত নহ’ল ৷ নতুন শিক্ষা নীতি 2020 অনুসৰি, 4.11 আৰু 4.12 ত উল্লেখ থকা অনুসৰি শিক্ষাৰ মাধ্যম প্ৰৱৰ্তন কৰাৰ উপৰিও নতুন শিক্ষক পদ সৃষ্টিৰে নিযুক্তিৰ বাধ্যতামূলকতাৰ কথাও আছে বুলি সংবাদ মেলত উল্লেখ কৰে সন্থাই ।
