মাজুলী,10 জুন : প্ৰাক্তন মুখ্যমন্ত্ৰী সৰ্বানন্দ সোণোৱালৰ গৃহ সমষ্টি মাজুলীৰ বিধ্বস্ত পথে জীয়াতু ভোগাইছে সাধাৰণ জনতাক ৷ অভিযোগ অনুসৰি বালিগাঁও চাৰিআলিৰ পৰা মিলনপুৰ নিখিনিখোৱা হৈ চিৰাম তেলিয়াবাৰীলৈ যোৱা পথটো আজিকোপতি নিৰ্মাণ তথা মেৰামতি কৰাৰ ক্ষেত্ৰত ব্যৱস্থা গ্ৰহণ নকৰিলে বিভাগীয় কৰ্তৃপক্ষই ৷
5 বছৰে পথটো নিৰ্মাণ নকৰাত এতিয়া নিজৰ গাঁঠিৰ ধন খৰচ কৰি পথ মেৰামতি কৰিবলৈ ওলাই আহিল মিলনপুৰ, নিকিনিখোৱা, তেলিয়াবাৰী গাঁৱৰ কুৰিৰো অধিক পুৰুষ-মহিলা ৷ এই পথটোৱে দৈনিক যাতায়ত কৰে শ শ লোকে । গড়মুৰ মেডিকেল, কমলাবাৰী, ফুলনি, বিভিন্ন স্কুল-কলেজ, চিৰাম বৰগুৰি উপ-স্বাস্থ্য কেন্দ্ৰ, জেংৰাইকে আদি কৰি বিভিন্ন স্থানলৈ অহা-যোৱা কৰা এইটোৱে হৈছে এই গাঁও কেইখনৰ মূল পথ ।
স্থানীয় লোকে জানিবলৈ দিয়া অনুসৰি, বিগত দিন কেইটা হোৱা ধাৰাষাৰ বৰষুণৰ ফলত বোকাময় হৈ পৰা পথটোত এতিয়া যাতায়াত কৰিব নোৱাৰা অৱস্থা সৃষ্টি হৈছে ৷ গাড়ী, মটৰ, চাইকেলতো বাদে খোজকাঢ়ি যাবৰ বাবে সাধাৰণ পথচাৰীয়ে বহুবাৰ ভাবিবলগীয়া হয় ৷ জৰুৰীকালীন সেৱাৰ ক্ষেত্ৰটো এতিয়া জীয়াতু ভুগিবলগীয়া হোৱাৰ কথা সদৰী কৰিছে স্থানীয় লোকে ৷
লগতে পঢ়ক: মুখ্যমন্ত্রীয়ে মুকলি কৰিলে ৩০০ খন বিচনাযুক্ত ক'ভিড হাস্পতাল
