মাজুলী, 19 জুলাই : ব্ৰহ্মপুত্ৰ নদীৰ মাজত বুধবাৰে পুৱা আৱদ্ধ হৈ পৰে এখন যাত্ৰীবাহী ফেৰী ৷ পুৱা 7:30 বজাত নিমাতীৰ পৰা কমলাবাৰী ঘাটলৈ আহি থকা সময়তে নদীৰ মাজত আৱদ্ধ হৈ পৰে আৰ পি এল দিগৰু নামৰ ফেৰীখন ৷ ফেৰীখন আৱদ্ধ হৈ পৰাৰ তথ্য লাভ কৰাৰ পাচতেই উদ্ধাৰৰ বাবে মাজুলী কমলাবাৰী ঘাটৰ পৰা SDRF ৰ এটি দল ৰাওনা হয় ৷
যাত্ৰীবাহী ফেৰীখনত ১০১ জন যাত্ৰী আৰু ৩৪ খন মটৰচাইকেল আছিল ৷ উল্লেখ্য যে, ব্ৰহ্মপুত্ৰ নদীৰ জলস্তৰ বৃদ্ধিৰ বাবে বিগত এসপ্তাহ ধৰি বন্ধ হৈ আছিল নিমাতী কমলাবাৰী ফেৰী সেৱা ৷ ব্ৰহ্মপুত্ৰ নদীৰ বাঢ়নী পানীৰ ফলত বুৰ গৈছিল ফেৰী ৰখোৱা ৰেম্পসমূহৰ লগতে অহা-যোৱা কৰা বাট-পথসমূহ । ব্ৰহ্মপুত্ৰ নদীৰ পানী হ্ৰাস পোৱাৰ লগতে ৰেম্পসমূহ কিছু পৰিমাণে সুচল হোৱা বাবে আজিৰ পৰা পুনৰ আৰম্ভ কৰা হৈছিল ফেৰী সেৱা । ফেৰী সেৱা আৰম্ভ হোৱাৰ লগে লগেই কমলাবাৰী ফেৰীঘাটত যাত্ৰীৰ ব্যাপক ভিৰ পৰিলক্ষিত হয় ।
ইয়াৰ পূৰ্বে প্ৰতিকূল বতৰৰ বাবে ব্ৰহ্মপুত্ৰ নদীৰ মাজত এখন যাত্ৰীবাহী ফেৰী আৰু এখন জৰুৰীকালীন 108 সেৱা নৈৰ মাজত আৱদ্ধ হৈ পৰিছিল । মাজুলীৰ পৰা নিমাতী ঘাটত ৰোগী থৈ মাজুলীলৈ উভতাৰ পথতে ব্ৰহ্মপুত্ৰৰ মাজত কুঁৱলীৰ বাবে দিশ হেৰুৱাই 1 ঘণ্টা ধৰি নৈৰ এটি বালিচৰত আৱদ্ধ হৈ পৰিছিল 108 নৌকা এম্বুলেন্সখনে ।
মঙলবাৰে ব্ৰহ্মপুত্ৰ নদীৰ জলস্তৰ কিছু পৰিমাণে হ্ৰাস পোৱাৰ বাবে প্ৰশাসনে পুনৰ বুধবাৰৰ পৰা ফেৰী সেৱা আৰম্ভ কৰাৰ কথা ঘোষণা কৰে যদিও সেৱা আৰম্ভ হোৱাৰ দিনাই সংঘটিত হয় এই অঘটন ৷
লগতে পঢ়ক : ABSU slams arup kumar dey : বিজেপিৰ অৰূপ কুমাৰ দে’ক সাৱধানবাণী এবছুৰ সভাপতিৰ
