মাজুলী, 4 জুলাই : অসম বিভিন্ন কলা সংস্কৃতিৰে জীপাল হৈ থকা এখন মনোমোহা ঠাই ৷ এই ঠাইতেই জিলিকি ৰয় শিল্প সাধনাৰ একোখন জীয়া ছবি ৷ পুৰণি হ’লেও এলাগী নহয় শিল্পী সত্বাৰ সোণোৱালী অতীত । যুগৰ বিৱৰ্তনত সময় সলনি হ’লেও শিল্পীৰ অস্তিত্ব সংস্কৃতিৰ মাপকাঠি সলনি নহয় ৷ মাথোঁ সময়-কাল-স্থান ভেদে পৰিৱৰ্তনৰ ধাৰাৰে লয় নৱ ৰূপ । য'ত প্ৰতিফলিত হয় এখন সমাজৰ কলা-সংস্কৃতি আৰু শিল্প সাধনাৰ অনন্য নিদৰ্শন ৷
400 বছৰ পূৰ্বে আহোম যুগৰ পৰম্পৰাত আভিজাত্যৰ প্ৰতীকৰূপে শিল্প কলাই যি স্থান লাভ কৰিছিল, বিভিন্ন প্ৰত্যাহ্বানৰ মাজত আজিও একে মৰ্যাদা তথা গৌৰৱ বহন কৰি আহিছে মাজুলীৰ সত্ৰত লালিত পালিত এপদ কুটীৰ শিল্পই । ৰাষ্ট্ৰীয়, আন্তঃৰাষ্ট্ৰীয় প্ৰেক্ষাপটত সমাদৃত ঐতিহ্য বহনকাৰী এই শিল্প বিধ হৈছে বেতৰ বিচনী । হেঙুল হাইতেলে সুশোভিত, মখমল কোপোৰেৰে চিলোৱা মনোমোহা বেতৰ বিচনী হৈছে সত্ৰৰ ঐতিহ্য, আভিজাত্যৰ প্ৰতীক ।
আহোম ৰজাসলকৰ লগতে 1872 চনতে প্ৰয়াত আউনীআটী সত্ৰৰ সত্ৰাধিকাৰ দত্তদেৱ গোস্বামীয়ে বৃটিছ চাহাবক উপহাৰ দিছিল এই বিশেষ বিচনী । ইয়াৰ পাছত ক্ৰমে মহাত্মা গান্ধী, জৱাহৰলাল নেহৰুৰ পৰা প্ৰাক্তন প্ৰধানমন্ত্ৰী মনমোহন সিং, ৰাষ্ট্ৰপতি আব্দুল কালাম, বৰ্তমানৰ প্ৰধানমন্ত্ৰী নৰেন্দ্ৰ মোডীকো উপহাৰ হিচাপে সত্ৰই দিছে এইখন বিশেষ বিচনী ।
লণ্ডনৰ বৃটিছ মিউজিয়াম, দিল্লী ৰাষ্ট্ৰীয় সংগ্ৰহালয়, ৰাজীৱ গান্ধী সংগ্ৰহালয়, ভূপাল ৰাজ্যিক সংগ্ৰহালয় আদিত সংৰক্ষণৰ কৰিছে এই শিল্পবিধ । দেশী বিদেশী পৰ্যটকৰো বিশেষ আৰ্কষণৰ কেন্দ্ৰবিন্দু এই শিল্পবিধ । ঐতিহাসিক আউনীআটী সত্ৰৰ লগতে কমলাবাৰী সত্ৰৰ বৰ্তমানে 300 গৰাকী শিল্পী কুটিৰ শিল্পটোৰ লগত জড়িত হৈ আছে । এই বিচনীখন এজন সুনিপুন শিল্পীক প্ৰস্তুত কৰিবলৈ সময় লাগে 5 দিনৰ ।
ইয়াৰ বৰ্তমানৰ মূল্য 1000/1200 টকা । এই বিচনী সৌন্দৰ্যৰো প্ৰতীক। বিগত দুটা বছৰে ক’ভিডসৃষ্ট পৰিৱেশে বিধস্ত কৰিছে পৰ্যটন উদ্যোগ, সভা-সমিতি, বিবাহ অনুষ্ঠান বন্ধ গতিকে স্তব্ধ হৈছে ঐতিহ্যবহনকাৰী কুটিৰ শিল্পবিধ । এই সময়ছোৱাত শিল্পী সকলক কিঞ্চিৎ মাত্ৰ সাহাৰ্য আগবঢ়ালে জীয়াই থাকিব এই প্ৰাচীন ঐতিহ্য।
লগতে পঢ়ক:মৰাণত ব্যতিক্ৰমী পৰম্পৰাৰে একাঁঠু বোকাত গীত গাই ভূঁই ৰুইছে ৰোৱনীয়ে
