মাজুলীৰ স্বাস্থ্যখণ্ডক লৈ উদ্বিগ্ন মুখ্যমন্ত্ৰী সৰ্বানন্দ সোণোৱাল

বিধস্ত স্বাস্থ্যখণ্ডক লৈ উদ্বিগ্ন মুখ্যমন্ত্ৰী সৰ্বানন্দ সোণোৱাল ৷ অসমৰ স্বাস্থ্য বিভাগৰ উচ্চ পৰ্যায়ৰ বিষয়াৰে বৈঠক ৷ প্লাষ্টিকৰ বটলেৰে নিৰ্মিত অংগনবাদী কেন্দ্ৰৰ প্ৰশংসা মুখ্যমন্ত্ৰী সোণোৱালৰ ৷

মাজুলী,6 জানুৱাৰী : মুখ্যমন্ত্ৰী সৰ্বানন্দ সোণোৱালে সোমবাৰে মাজুলী ভ্ৰমণৰ কাৰ্যসূচী গ্ৰহণ কৰে ৷ মাজুলীত উপস্থিত হৈ মুখ্যমন্ত্ৰীগৰাকীয়ে স্বাস্থ্য খণ্ডৰ উন্নয়ন সন্দৰ্ভত বিভাগটোৰ শীৰ্ষ বিষয়াসকলৰ সৈতে এক উচ্চস্তৰীয় বৈঠকত মিলিত হয় ৷ প্ৰধান সচিব সমীৰ সিন্হাৰ নেতৃত্বত অহা বিভাগীয় উচ্চস্তৰীয় দলটোত আছিল এনএইচএমৰ পৰিচালন সঞ্চালক ডাঃ লক্ষ্মণৰ লগতে অসম চিকিৎসা মহাবিদ্যালয় আৰু যোৰহাট চিকিৎসা মহাবিদ্যালয়ৰ অধ্যক্ষ আৰু অধীক্ষক ৷ প্ৰসূতি আৰু শিশুৰ স্বাস্থ্যৰ সু-ব্যৱস্থা, চিকিৎসালয়ৰ উন্নীতকৰণ, বিশেষজ্ঞ চিকিৎসক নিযুক্তি আদিৰ প্ৰসংগত মুখ্যমন্ত্ৰীয়ে শীৰ্ষ বিষয়াসকলৰ সৈতে বৈঠকত আলোচনা কৰে ৷

এতিয়াৰে পৰা মাজুলীত ৰাজ্যিক স্বাস্থ্য সেৱাৰ অধীনত স্ত্ৰীৰোগ, শিশু আৰু এনাস্থেছিয়াৰ এবছৰীয়া স্নাতকোত্তৰ ডিপ্ল’মাৰ পাঠ্যক্ৰম গ্ৰহণ কৰা চিকিৎসকৰ দলক নিয়োজিত কৰি মাজুলীবাসীক সেৱা প্ৰদানৰ ব্যৱস্থা কৰা হ’ব ৷ এনে একোটা দলে তিনিমাহ বাহৰ পাতি চিকিৎসা সেৱা প্ৰদান কৰাৰ পাছত নতুন দল আহিব ৷ তদুপৰি প্ৰতিটো সপ্তাহত দুদিনৰ বাবে যোৰহাট আৰু ডিব্ৰুগড় চিকিৎসা মহাবিদ্যালয়ৰ অধ্যাপকৰ একোটাকৈ দল মাজুলীলৈ আহিব ৷ মুখ্যমন্ত্ৰীৰ ঘোষণা অনুসৰি গড়মূৰৰ জিলা অসামৰিক চিকিৎসালয়ৰ নৱনিৰ্মিত ভৱনটো ১৫ ফেব্ৰুৱাৰীৰ ভিতৰত মুকলি কৰাৰ লগতে জানুৱাৰীৰ শেষভাগৰ পৰা মৰণোত্তৰ পৰীক্ষা ব্যৱস্থা আৰম্ভ কৰা হ'ব ৷ শাসনভাৰ চম্ভালাৰ চাৰে চাৰি বছৰ পিছত মুখ্যমন্ত্ৰীগৰাকীয়ে এনেদৰে স্বাস্থ্যখণ্ডৰ প্ৰতি গুৰুত্ব দিয়া কাৰ্য একপ্ৰকাৰৰ নিৰ্বাচনী চমক বুলি অভিহিত কৰিছে একাংশই ৷

আনহাতে, পাৱনাগাঁৱত অসমৰ প্ৰথমতো প্লাষ্টিকৰ পেলনীয়া বটলৰ দ্বাৰা নিৰ্মিত অংগনবাদী কেন্দ্ৰটো উদ্বোধন কৰি মাজুলীৰ উপায়ুক্ত বিক্ৰম কৈৰীৰ ভূয়সী প্ৰশংসা কৰে মুখ্যমন্ত্ৰী সোণোৱালে ৷

লগতে চাওকঃ গুৰুতৰভাৱে অসুস্থ প্ৰখ্যাত বিজ্ঞানী ডঃ জিতেন্দ্ৰ নাথ গোস্বামী