মাজুলী, 6 নৱেম্বৰ : কাইলৈৰ পৰা মাজুলীৰ গৌৰৱ ৰাস মহোৎসৱ (Majuli Raas 2022) । ৰাস বুলিলেই পোনতে মনলৈ আহে সত্ৰ নগৰী মাজুলীৰ ছবিখন । মাজুলীৰ লগত ৰাসৰ আছে এক এৰাব নোৱৰা সম্পৰ্ক । এই ৰাস মহোৎসৱৰ সময়ত মাজুলী পৰিণত হয় দ্বিতীয় বৃন্দাবনলৈ । কৃষ্ণ লীলাৰ বন্দনাত মুখৰিত হয় সত্ৰনগৰী মাজুলীৰ আকাশ বতাহ (Final Raas preparation in Majuli)।
মাজুলীৰ প্ৰায় 14 খন সত্ৰ আৰু প্ৰায় অৰ্দ্ধশতাধিক ৰংগমঞ্চত অনুষ্ঠিত হ’ব এই ৰাস মহোৎসৱ । বাৰিষাৰ বানে জুৰুলা কৰাৰ পাচত শৰৎ কালৰ এই মধুৰ সময়ত সকলো দুখ বেদনা একাষৰীয়া কৰি মাজুলীৰ শিশুৰ পৰা বৃদ্ধলৈকে সকলো ব্যস্ত হৈ পৰে এই ৰাস মহোৎসৱক লৈ । কৃষ্ণৰ বাঁহীৰ অমিয়া সুৰে মুখৰিত কৰি তুলিছে সত্ৰনগৰী মাজুলী (Raas preparation in Majuli) ।
কৃষ্ণ বন্দনাৰে মুখৰিত হৈ পৰিছে মাজুলীৰ আকাশ বতাহ । মাজুলীৰ গৌৰৱ ৰাস মহোৎসৱৰ অন্যতম আকৰ্ষণ হ’ল অজগৰ ৰূপী অঘাসুৰ । দাম, সুদামসহ গকুলৰ গোপ-বালকসকলক লৈ শ্ৰীকৃষ্ণই কেলি কৰা সময়ত এই প্ৰকাণ্ড অজগৰে গোপ বালকসকলক গিলাৰ দৃশ্যই আকৰ্ষণ কৰে দৰ্শকক ৷
শ্ৰীকৃষ্ণক গিলিবলৈ লওতেই ভগৱান কৃষ্ণই বধ কৰে অজগৰৰূপী অঘাসুৰক ৷ এতিয়া মাজুলীত এই অঘাসুৰৰেই অতপালি ৷ আখৰাত ব্যস্ত অঘাসুৰ ৷ ইফালে মুখাশিল্পীসকল ব্যস্ত মুখাত শেষ পৰশ দিয়াত ৷ মাজুলী নতুন চামগুৰি সত্ৰৰ মুখাশিল্পীসকলেও এতিয়া মুখাত শেষ পৰশ দিয়াত ব্যস্ত ।
আনহাতে, এইবাৰ মাজুলীৰ আঞ্চলিক জনতা কৃষ্টি সংঘৰ ৰাসত কে কে খ্যাত অভিনেতা সিদ্ধাৰ্থ শৰ্মাই কৰিব অভিনয় । হাঁহি নহয়, এইবাৰ চকুত চকুলো লৈ আহি আছে জনপ্ৰিয় অভিনেতা সিদ্ধাৰ্থ শৰ্মা । বাসুদেৱৰ চৰিত্ৰত অভিনয় কৰিব অভিনেতা সিদ্ধাৰ্থ শৰ্মাই । তাৰ বাবে মাজুলীত আখৰাত ব্যস্ত জনপ্ৰিয় ধাৰাবাহিক বেহাৰবাৰী আউটপোষ্টৰ কে কে ।
অন্যহাতে, নামনি মাজুলীৰ গুৱালগাঁৱত দুটা দিনত ক্ৰমে দৈৱকী আৰু যশোদাৰ ভাওত অভিনয় কৰিব অসমৰ মোহময়ী অভিনেত্ৰী সুকন্যা ৰাজগুৰুৱে । বিশ্ববাসীৰ আগত মাজুলীক দুনাই চিনাকী কৰি দিয়াৰ কোনো প্ৰয়োজন নাই ৷ মাজুলীৰ আছে নিজস্ব স্বকীয়তা, নিজস্ব বৈশিষ্ট ৷ সেয়ে সকলোৱে মাজুলীলৈ আহি মাজুলীক উপভোগ কৰাৰ উপৰিও মাজুলীখনক মৰমৰ দৃষ্টিৰে চাবলৈ সকলোকে আহ্বান জনাইছে অভিনেত্ৰী সুকন্যা ৰাজগুৰুৱে ৷
কাইলৈৰ পৰা হ’বলগীয়া ৰাসক লৈ সাজু হৈছে আভ্যন্তৰীণ জল পৰিবহন বিভাগো । যাত্ৰীৰ সুবিধাৰ্থে তিনিটাকৈ ৰেম্পৰ নিৰ্মাণ কৰা হৈছে অফলামুখ ঘাটত । লগতে নিৰ্মাণ কৰা হৈছে বেৰীকেট । ইয়াৰ উপৰিও থাকিব অনুসন্ধান কক্ষ । মাইকযোগে ঘোষণা কৰিব কোন ৰেম্পৰ পৰা কিমান সময়ত ফেৰী যাব নিমাতিলৈ ।
যাত্ৰীৰ অনুপাতে সঘনাই ফেৰী চলোৱাৰ পৰিকল্পনা হাতত লৈছে মাজুলীৰ আভ্যন্তৰীণ জল পৰিবহন বিভাগে (Majuli IWT) ৷ যাত্ৰীয়ে যাতে আভ্যন্তৰীণ জল পৰিবহন বিভাগক সহযোগ কৰে তাৰ প্ৰতি আহ্বান জনাইছে আভ্যন্তৰীণ জল পৰিবহন বিভাগে । আনহাতে, এই ৰাস মহোৎসৱক লৈ কাইলৈ মাজুলীত স্থানীয় বন্ধৰো ঘোষণা কৰা হৈছে । এনেদৰেই এতিয়া সকলো মাজুলীয়ালৰ লগতে ব্যস্ত হৈ পৰিছে জিলা প্ৰশাসনো ৷
লগতে পঢ়ক : Raas mahotsav 2022 : ৰাস মহোৎসৱৰ আখৰাত ব্যস্ত মাজুলীয়াল
