বিহপুৰীয়া ,12 জুলাই : এফালে ৰাজ্যত ভেকচিনৰ নাটনি আৰু আনফালে একে সময়তে এগৰাকী মহিলাক দুটাকৈ ভেকচিন প্ৰদান কৰা অবাঞ্চিত ঘটনা । প্ৰকৃততে কি কাৰণত এনেধৰণৰ ঘটনা সংঘটিত হ'ল সেয়া জানিব পৰা হোৱা নাই । ৰাজ্যত মহামাৰী ক'ভিড ভয়াৱহতা যিমানে বৃদ্ধি পাইছে, সিমানে ক’ভিড প্ৰতিষেধক ল’বলৈ ৰাজ্যৰ বিভিন্ন অঞ্চলত ৰাইজে হেতা-ওপৰা কৰা পৰিলক্ষিত হৈছে ৷ কিন্তু বহু অঞ্চলত ৰাইজ এতিয়াও বঞ্চিত হৈ আছে প্ৰতিষেধক লাভৰ পৰা ৷
ভয়াৱহ ক’ভিড পৰিস্থিতিৰ সময়ত সমগ্ৰ ৰাজ্যতে ভেকচিনৰ ব্যৱস্থা কৰিছে চৰকাৰে ৷ এই ভেকচিন প্ৰদানৰ কাৰ্য সূচাৰুৰূপে পালন হৈ আছে যদিও কোনো কোনো ঠাইত যথেষ্ট অনিয়ম সংঘটিত হোৱা দেখিবলৈ পোৱা গৈছে ৷ নাৰায়ণপুৰত স্বাস্থ্যকৰ্মীয়ে এগৰাকী মহিলাক এসময়তে দিলে দুবাৰকৈ ভেকচিন ৷ যাক লৈ এতিয়া তীব্ৰ প্ৰতিক্ৰিয়াৰ সৃষ্টি হৈছে সমগ্ৰ নাৰায়ণপুৰত।
নাৰায়ণপুৰৰ ধলপুৰ ব্লকৰ অধীনত সোমবাৰৰ দিনটোত মুঠ 12 টাকৈ স্থানত অনুষ্ঠিত হৈছিল মেগা ভেকচিন প্ৰদান শিবিৰ । প্ৰতিটো শিবিৰত 250 গৰাকীকৈ লোকক কোভাক্সিন (COVAXINE) ৰ প্ৰথম আৰু দ্বিতীয় পালি ভেকচিন প্ৰদান কৰা হৈছিল । তাৰ মাজতে নাৰায়ণপুৰৰ মাধৱদেৱ বিশ্ববিদ্যালয়ৰ ক’ভিড ভেকচিন প্ৰদান কেন্দ্ৰত ঘটিল এটা অঘটন ।
সুমতি বিশ্বাস নামৰ 52 বছৰীয়া এগৰাকী মহিলাক দুবাৰকৈ প্ৰদান কৰা হয় ভেকচিন ৷ মাতৃক এনেদৰে চকুৰ সন্মুখততে দুবাৰ একেসময়তে দুবাৰকৈ প্ৰতিষেধক দিয়াত আচৰিত হৈ পুত্ৰই স্বাস্থ্য কৰ্মী পাতলী ভূঞাক প্ৰশ্ন কৰাত কেন্দ্ৰটোত এক হুলস্থুলীয়া পৰিৱেশৰ সৃষ্টি হয় । কিছুসময় পিছত মহিলাগৰাকীক নাৰায়ণপুৰ আদৰ্শ চিকিৎসালয়ত ভৰ্তি কৰে যদিও সামান্য কেইটামান টেবলেট দি মহিলাগৰাকীক ঘৰলৈ পঠিয়াই দিয়ে । বৰ্তমান মহিলাগৰাকী সুস্থ হৈ আছে যদিও আশংকাত ভুগিছে মহিলাগৰাকীৰ লগতে পৰিয়াল ।
ইয়াৰ পূৰ্বে বিশ্বনাথৰ বিহালীত এগৰাকী যুৱতীক একেদিনাই ২টাকৈ ক’ভিড ভেকচিন (Covid vaccine) প্ৰদান কৰাৰ অভিযোগ উত্থাপন হৈছে ৷ এই ঘটনাই সম্প্ৰতি সচেতন মহলত সৃষ্টি কৰিছে তীব্ৰ প্ৰতিক্ৰিয়াৰ ৷ ইয়াৰ পাচতেই এই অনুৰূপ ঘটনা ঘটিছে নাৰায়ণপুৰত ৷ এতিয়া প্ৰশ্ন হয় এনেধৰনৰ ভুলৰ বাবে দোষী কোন ? প্ৰকৃততে উচিত তদন্ত হ’বনে সেয়া লক্ষণীয় হ’ব ৷
লগতে পঢ়ক: 5 মিনিটত দুবাৰ ভেকচিন ল’লে এগৰাকী যুৱতীয়ে : ভুল কাৰ ?
