বিহপুৰীয়া, 8 আগষ্ট : সম্প্ৰতি বিতৰ্কই যেন লগ এৰা দিয়া নাই লখিমপুৰ জিলাৰ বিহপুৰীয়াৰ ঐতিহ্যমণ্ডিত শিক্ষানুষ্ঠান বিহপুৰীয়া মহাবিদ্যালয়ক । এইবাৰ পুনৰ আন এক বিৰ্তকত সাঙোৰ খাই পৰিছে বিহপুৰীয়াৰ এই ঐতিহ্যমণ্ডিত শিক্ষানুষ্ঠানখন । সৌ সিদিনালৈকে এই মহাবিদ্যালয়খনত অধ্যক্ষ আৰু শিক্ষক গোটৰ মাজত সৃষ্টি হৈছিল সংঘাত ৷ এই সংঘাতৰ কোনো ধৰণৰ এক সুমীমাংসা নৌহওঁতেই পুনৰ মাহাবিদ্যালয়খনৰ কেইগৰাকীমান শিক্ষক সোমাই পৰিছে আন এক বিৰ্তকৰ আৱৰ্তত ।
বিশেষকৈ মহাবিদ্যালয়খনৰ অধ্যাপক ৰাতুল বৰাই কৰা কৰ্মকাণ্ডকলৈ শেহতীয়াকৈ সমগ্ৰ বিহপুৰীয়া আজি তোলপাৰ হৈ পৰিছে ৷ দুটা ফোনকলে উদঙাইছে মহাবিদ্যালয়খনৰ অধ্যাপক ৰাতুল বৰাই চাকৰি দিয়াৰ নামত কৰা ঠগ প্ৰৱঞ্চকৰ অন্য এক অধ্যায় । সহজলভ্য ধনৰ মোহত পৰি এগৰাকী শিক্ষকে ধনৰ বিনিময়ত চৰকাৰী বিষয়াৰ ভুৱা চহীৰে বহুতকে নিযুক্তিপত্ৰ প্ৰদান কৰাৰ অভিযোগ উত্থাপিত হৈছে ৷
ইমানেই নহয় অধ্যাপক ৰাতুল বৰাই ডক্টৰেক্ত ডিগ্ৰীৰ প্ৰমাণপ্ৰত্ৰ প্ৰদানৰ নামতো লখিমপুৰ জিলাৰ বিভিন্ন প্ৰান্তৰ পৰা বহুলোকৰ পৰা লাখে লাখে টকা লোৱাৰো অভিযোগ উঠিছে । এই অভিযোগ তৰিছে অসমীয়া যুৱ মঞ্চৰ কাৰ্যকৰী সভাপতি ধৰ্মকান্ত গগৈয়ে ।
ইতিমধ্যে অধ্যাপকগৰাকীৰ বিৰুদ্ধে গগৈয়ে লখিমপুৰ জিলাৰ আৰক্ষী অধীক্ষকগৰাকীক এক এজাহাৰ দাখিল কৰাৰ উপৰিও সামাজিক মাধ্যমত ভাইৰেল কৰিছে ইটোৰ পিচত সিটো কল ৰেকৰ্ডিং । ভাইৰেল ফোনকলৰ পাচতে সৰ্বত্ৰে সৃষ্টি হৈছে তীব্ৰ প্ৰতিক্ৰিয়াৰ ৷
ইপিনে এই দুটা ফোনকল ভাইৰেল হোৱাৰ পিচত টাই আহোম যুৱ পৰিষদৰ উপ সভাপতি পৰমানন্দ গগৈয়েও সোমবাৰে মহাবিদ্যালয়ৰখনৰ অধ্যক্ষক এখন স্মাৰক পত্ৰৰ যোগেদি সমগ্ৰ বিষয় সন্দৰ্ভত তদন্ত দাবী তোলে । এই সন্দৰ্ভত বিভাগীয় বিষয়াই কি ব্যৱস্থা গ্ৰহণ কৰিব সেয়াহে হ’ব লক্ষণীয় ৷
