নাওবৈচা,১৭ ফেব্ৰুৱাৰী: লখিমপুৰ জিলাৰ বৃহত্তৰ নাওবৈচা অঞ্চলৰ উচ্চ শিক্ষাৰ প্ৰাণকেন্দ্ৰ স্বৰূপ নাওবৈচা মহাবিদ্যালয়ৰ নৱ নিৰ্মিত তোৰণখন মঙলবাৰে সৰস্বতী পূজাৰ দিনা আনুষ্ঠানিকভাৱে উদ্বোধন কৰে । মহাবিদ্যালয়ৰ শিক্ষক-শিক্ষয়িত্ৰী আৰু কৰ্মচাৰীসকলৰ প্ৰায় ৩ লাখ ৯০ হাজাৰ টকাৰ বৰঙণিৰে আটক ধুনীয়াকৈ নিৰ্মাণ কৰি উলিওৱা তোৰণখন এক মাংগলিক পৰিৱেশত উদ্বোধন কৰে আন্তঃৰাষ্ট্ৰীয় উদ্ভাৱক পদ্মশ্ৰী উদ্ধৱ ভৰালীয়ে ।
একেদৰে সৰস্বতী পূজাৰ লগত সংগতি ৰাখি নাওবৈচা মহাবিদ্যালয় প্ৰকাশন ব’ৰ্ডৰ উদ্যোগত ছাত্ৰ-ছাত্ৰীসকলৰ সহযোগত এখনি গ্ৰন্থমেলাৰ লগতে শিক্ষা বিভাগৰ প্ৰাচীৰ প্ৰত্ৰিকা "শিক্ষাজ্যোতি" ৰ শুভ উদ্বোধন কৰে উদ্ভাৱক পদ্মশ্ৰী উদ্ধৱ ভৰালীয়ে । এই উদ্দেশ্যৰে মহাবিদ্যালয়খনৰ প্ৰেক্ষাগৃহত অনুষ্ঠিত এক অনুষ্ঠানত ভৰালীয়ে এই অনুষ্ঠানৰ অংশ হ’বলৈ পাই সৌভাগ্যবান বুলি অভিহিত কৰি মহাবিদ্যালয় কৰ্তৃপক্ষৰ প্ৰচেষ্টাক শলাগে ৷ যিয়ে ছাত্ৰ-ছাত্ৰীৰ শিক্ষাৰ লগতে বৌদ্ধিক বিকাশত যথেষ্ট সহায় কৰিব ৷
আনহাতে উদ্ভাৱক গৰাকীয়ে সাংবাদিকক জানিবলৈ দিয়া মতে, বৰ্তমান ভৰালীয়ে প্ৰতিদিনে তিনিঘণ্টা সময় ব্যয় কৰি বিশেষভাৱে সক্ষম লোকৰ বাবে বিশেষ সঁজুলি আৱিষ্কাৰ কৰাৰ কামত নিয়োজিত হৈ আছে ৷ লখিমপুৰৰ যুৱ খেতিয়কসকলে কৰা আলু খেতি চপোৱাৰ বাবে এটি যন্ত্ৰ আৱিষ্কাৰৰ কামতো ব্যস্ত আছে উদ্ভাৱকগৰাকী ৷
লগতে পঢ়কঃ বাঁহীবাদক প্ৰভাত শৰ্মাৰ দেহাৱসান
