নাওবৈচা, ৫ অক্টোবৰ: নাওবৈচাৰ লালুকত সংঘটিত হৈছে এক ভয়ংকৰ ঘটনা । লালুকৰ কৰুণাবাৰী বেচাপট্ৰিত দেওবাৰে নিশা দুৰ্বৃত্তই এটা পৰিয়ালত কৰে এচিড আক্ৰমণ। নিশা দুই বজাত ছাইফুল ইছলামৰ বাসগৃহত এই আক্ৰমণ কৰে দুৰ্বৃত্তই । এই আক্ৰমণত মহিলা, শিশু, কিশোৰীসহ গুৰুতৰভাৱে আহত হৈছে পাঁচগৰাকীকৈ লোক । নিশাই সংকটজনক অৱস্থাত আঘাতপ্ৰাপ্ত লোকসকলক লখিমপুৰ অসামৰিক চিকিৎসালয়ত ভৰ্তি কৰে লালুক আৰক্ষীয়ে ।
এই আক্ৰমণত আহত হোৱা লোককেইজন ক্ৰমে: ছালেহা খাতুন (৪৮), হাবিজা খাতুন (৩০), আনোৱাৰা বেগম (২৮), মামুনি বেগম (১৮), খুৰ্ছিদা বেগম (৯), এতৰাজ আলী (৪) এই সকল গুৰুতৰভাৱে আঘাতপ্ৰাপ্ত লোকৰ মুখ, পিঠি, পেট, বুকুত দুৰ্বৃত্তই এচিড দলিয়াই পলায়ন কৰে। দুৰ্বৃত্তই নিশা দৰ্জা খুলি ঘৰৰ ভিতৰত প্ৰৱেশ কৰি নগদ ধন, মোবাইল ফোন লুটপাত কৰাৰ পিছত গভীৰ নিদ্ৰাত থকা পৰিয়ালটোক এচিডেৰে আক্ৰমণ কৰে। বৰ্তমান মামুনি বেগম(১৮), খুৰ্ছিদা বেগম (৯) আৰু এতৰাজ আলী ( ৪) ৰ অৱস্থা অতি সংকটজনক বুলি জানিব পৰা গৈছে।
ইফালে লালুক আৰক্ষীয়ে নিশাই ঘটনাস্থলীত উপস্থিত হৈ আঘাতপ্ৰাপ্ত পৰিয়ালৰ সদস্য সকলক চিকিৎসালয়লৈ প্ৰেৰণ কৰাৰ লগতে দুৰ্বৃত্তক কৰায়ত্ব কৰিবলৈ নিশাৰ পৰাই অভিযান অব্যাহত ৰাখিছে।
লগতে পঢ়ক: লিকাবালিত ভয়ংকৰ ঘটনাঃ বাঢ়নী পানীয়ে উটুৱাই নিলে 3 ডাম্পাৰ চালকক
