লখিমপুৰ, 2 ছেপ্তেম্বৰ: ৰাজ্যত মহিলা সুৰক্ষা বিধেয়ক প্ৰৱৰ্তনৰ দাবী দুৰ্নীতি বিৰোধী যুৱশক্তি অসমৰ(Anti corruption youth Assam) । বুধবাৰে সন্ধিয়া ভাগত লখিমপুৰ নগৰৰ ৰাজপথত ‘মৌন পোহৰ সমদল’ কাৰ্যসূচী ৰূপায়ন কৰি এই দাবী জনায় সংগঠনটোৱে । মৰিঢল মহাবিদ্যালয়ৰ ছাত্ৰী নন্দিতা শইকীয়াকে ধৰি অকাল মৃত্যুক সাৱতি লোৱা কিশোৰী, যুৱতী, মহিলাৰ সদগতি কামনাৰ্থে সংগঠনটোৱে উলিয়ালে মৌন পোহৰ সমদল ৷
সমদলত অংশ লৈ ৰাজ্যত কিশোৰী-মহিলাৰ ওপৰত হোৱা নিৰ্যাতনৰ ঘটনা প্ৰবাহত উদ্বেগ প্ৰকাশ কৰি মহিলা সুৰক্ষা বিধেয়ক প্ৰৱৰ্তনৰ দাবী উত্থাপন কৰে সংগঠনটোৰ কেন্দ্ৰীয় সভাপতি ধৰ্মকান্ত গগৈয়ে । ৰাজ্যত প্ৰতিদিনে 5 টাকৈ এনে ঘটনা সংঘটিত হোৱা বুলি মন্তব্য কৰে কেন্দ্ৰীয় সভাপতিগৰাকীয়ে ।
গো সুৰক্ষাৰ সমান্তৰালকৈ মহিলাৰ সুৰক্ষাও নিশ্চিত কৰিবলৈ চৰকাৰক দাবী জনায় সংগঠনটোৰ কেন্দ্ৰীয় নেতাগৰাকীয়ে । ইয়াৰোপৰি তেওঁ জনমত গঠনৰ হকে বিভিন্ন দল-সংগঠনক দাবী কৰিবলৈ আহ্বান জনায় ৷
লগতে পঢ়ক: দেৱনাগৰী লিপি চুক্তিত অন্তৰ্ভুক্ত হ’লে জ্বলিব পাহাৰ : ৰবীন্দ্ৰ ৰংপি
