লখিমপুৰ, ২৯ মে': শুকুৰবাৰে সন্ধিয়া পৰলোকপ্ৰাপ্তি ঘটে লখিমপুৰ বাণিজ্য মহাবিদ্যালয়ৰ প্ৰাক্তন অধ্যক্ষ তথা সমাজকৰ্মী ব্ৰজেন শৰ্মা বৰুৱাৰ । লখিমপুৰ নগৰৰ ৯ নং ৱাৰ্ডৰ নিবাসী ব্ৰজেন শৰ্মা বৰুৱা বিগত কিছু দিন ধৰি গুৱাহাটীস্থিত হেল্থ চিটী হাস্পতালত চিকিৎসাধীন হৈ আছিল ।
বাৰ্ধক্যজনিত ৰোগত আক্ৰান্ত হৈ অৱশেষত চিৰবিদায় মাগিলে ৮৪ বছৰীয়া সমাজকৰ্মীগৰাকীয়ে । তেওঁ কেন্দ্রীয় কলেজৰ পৰিচালনা সমিতিৰ সভাপতি, পঞ্চানন দেৱালয় কল্যাণ ট্রাষ্টৰ সভাপতিৰ দায়িত্ব পালন কৰাৰ লগতে বিভিন্ন অনুষ্ঠানৰ গুৰুত্বপূৰ্ণ দায়িত্বত থাকি সমাজ সেৱা কৰি আহিছিল । তেওঁৰ বিয়োগত লখিমপুৰ জিলা ছাত্র সন্থাকে ধৰি বিভিন্ন দল-সংগঠনে গভীৰ শোকপ্রকাশ কৰিছে । ব্ৰজেন শৰ্মা বৰুৱাৰ মৃত্যুৱে এতিয়া শোকৰ ছাঁ পেলাইছে লখিমপুৰত ।
