লখিমপুৰ, ৮ জানুৱাৰী: অনুসূচিত জাতিৰ স্বায়ত্তশাসনকে ধৰি বিভিন্ন সমস্যা সমাধানৰ দাবীত আজি ৰাজ্যজুৰি অৱস্থান ধৰ্মঘট কাৰ্যসূচী ৰূপায়ণ কৰে অনুসূচিত জাতি যুৱ ছাত্র পৰিষদে । ৰাজ্যৰ আন জিলাৰ দৰে পৰিষদে লখিমপুৰ জিলাতো জিলা আয়ুক্তৰ কাৰ্যালয়ৰ সন্মুখত অৱস্থান ধৰ্মঘট ৰূপায়ণ কৰে । অৱস্থান ধৰ্মঘটথলীত পৰিষদৰ নেতৃত্বই কয় যে অসম চৰকাৰে আৰম্ভ কৰা মিছন ভূমিপুত্রৰ জৰিয়তে বর্তমানলৈকে তিনি লাখতকৈও অধিক অনুসূচিত জাতিৰ প্ৰমাণ পত্র প্রদান কৰা হৈছে । কিন্তু মিছন ভূমিপুত্ৰৰ জৰিয়তে অনলাইন অথবা অফলাইন পদ্ধতিত অনুসূচিত জাতিৰ প্ৰমাণ পত্র লাভ কৰিবৰ বাবে যিসমূহ নিয়মাবলী নিৰ্দ্ধাৰণ কৰা হ'ল ।
এইক্ষেত্ৰত থকা সুৰুঙাৰ সুযোগ বুজি পিতৃৰ জাতিগত প্রমাণ পত্র অথবা পূর্বতে নিজ হাতে সংগ্রহ কৰা প্ৰমাণ পত্র জমা দি বিগত সময়ত অনা অনুসূচিত জাতিৰ ব্যক্তিয়ে অতি সহজতে জাতিগত প্রমাণ পত্র সংগ্ৰহ কৰা বুলি কয় অনুসূচীত জাতি যুৱ ছাত্র পৰিষদৰ কেন্দ্রীয় সহ সম্পাদক ক্ষীৰেণ দাসে । তদুপৰি, এনেধৰণৰ ব্যৱস্থাই পূৰ্বতে সংগ্ৰহ কৰা ভুৱা জাতিগত প্রমাণ পত্রক বৈধ কৰাৰ পুৰামাত্রাই সুবিধা প্রদান কৰিলে । সেয়েহে,'মিছন ভূমিপুত্ৰ'ৰ বিসংগতিপূর্ণ নিয়মাৱলী শীঘ্ৰে সংশোধন ঘটাই ১৯৫১ ৰ ৰাষ্ট্ৰীয় নাগৰিকপঞ্জী, ১৯৫০ আৰু ১৯৬৬-১৯৭১ৰ ভিতৰত ভোটাৰ তালিকা, ১৯৫০-১৯৭১ ৰ জাতিগত পিয়লৰ তথ্য আৰু জাতিগত পঞ্জীয়নভূক্ত অনুষ্ঠানৰ পৰা অনুমোদন সংগ্ৰহ কৰাটো বাধ্যতামূলকভাবে সন্নিবিষ্ট কৰিব লাগে । অন্যথা 'মিছন ভূমিপুত্র' বন্ধ কৰি দিয়াটোহে উচিত হ'ব বুলি তেওঁ কয় ।
অসম আৰক্ষীৰ বিভিন্ন আৰক্ষী থানা আৰু চি আইডিত ভুৱা জাতিগত প্রমাণ পত্ৰৰ ক্ষেত্ৰত ৰুজু হৈ থকা গোচৰসমূহ খৰতকীয়াকৈ তদন্ত কৰি ব্যবস্থা গ্রহণ কৰিব লাগে । অসম চৰকাৰৰ চাকৰিয়ালসকলৰ পদোন্নতিৰ ক্ষেত্ৰত সংবক্ষণ আইন বাৰম্বাৰ ভংগ হোৱাটো আমাৰ পৰিলক্ষিত হৈছে । "The Assam Scheduled Castes and Scheduled Tribes (Reservation of Vacancies in Services and Posts) (Amendment) Act, 2012" আইনখনৰ সঠিক প্রয়োগৰ কাৰণে যোৱা ২০১৬ৰ ৩ আগষ্টত অসম চৰকাৰৰ ভৈয়াম জনজাতি আৰু পিছপৰা শ্রেণী বিভাগে No TAD/BC/68/2011/Pt-1/207 মর্মে এখন অফিচ মেম'ৰেণ্ডাম প্রকাশ কৰিছিল যদিও বহু আঁসোৱাহপূর্ণ উক্ত মেম'ৰেণ্ডামখন সংশোধনীৰ বাবে অসম বিধানসভাৰ অনুসূচিত জাতি-জনজাতি কল্যাণ সমিতিয়ে বাৰাম্বাৰ সংশোধনীসহ পৰামর্শৱলী আগবঢ়োৱা স্বত্বেও আজি পর্যন্ত এই ক্ষেত্ৰত চৰকাৰে কোনোধৰণৰ পদক্ষেপ গ্রহণ কৰা নাই । ইয়াৰ পৰিবর্তে যোবা ২০২৩ৰ ১২ জানুৱাৰীত কেবিনেট সভাই সংৰক্ষিত পদৰ বিষয়া-কর্মচাৰীসকলৰ পদোন্নতিৰ ক্ষেত্ৰত পূৰ্বৰ 'জ্যেষ্ঠতাৰ ধাৰাবাহিকতা' কর্তন কৰি দিয়া কার্যই দেশৰ সংবিধান আৰু সংৰক্ষণ আইনখন অবমাননা কৰা হৈছে ।
তেওঁ কয় যে 'জ্যেষ্ঠতাৰ ধাৰাবাহিকতা' অবিহনে সংৰক্ষণ ব্যৱস্থা প্রকৃতাৰ্থত অর্থহীন হৈ পৰিছে । তদুপৰি,এনেধৰণৰ বঞ্চনাই অনুসূচিত জাতি-জনজাতিৰ বিষয়া-কর্মচাৰীসকলৰ মাজত হতাশা আহি পৰাটো স্বাভাবিক । গতিকে,পদোন্নতিৰ ক্ষেত্ৰত সংবক্ষণ আইন অনুযায়ী পূৰ্বৰ দৰেই 'জ্যেষ্ঠতাৰ ধাৰাবাহিকতা' অক্ষুন্ন ৰাখিব লাগে । তদুপৰি অসম চৰকাৰৰ বিভিন্ন বিভাগত অনুসূচিত জাতি-জনজাতিৰ প্রায় ২০ হাজাৰ বেকলগ পদ আছে বুলি যোবা ১৯/০৫/২০১৭ তাৰিখে তদানীন্তন ভৈয়াম জনজাতি আৰু পিছপৰা শ্রেণীৰ মন্ত্রীয়ে অসম বিধান সভাত ঘোষণা কৰাৰ পিছতো চৰকাৰে আজি পৰ্যন্ত খালী পদত নিযুক্তিৰ ব্যৱস্থা নকৰিলে । সেয়েহে বেকলগ পদসমূহ পূৰণৰ বাবে বিশেষ নিযুক্তি প্রক্রিয়া অনুষ্ঠিত কৰিবলৈ দাবী জনায় ।
তেওঁ অনুসূচিত জাতিৰ ছাত্র-ছাত্রীসকলৰ বর্তমান প্রদান কৰা ছাত্র জলপানিৰ পৰিমাণ ১০০% বৃদ্ধি কৰি চলিত বৰ্ষৰ পৰা নিয়মীয়াকৈ আদায় দিয়াৰ ব্যবস্থা গ্রহণ কৰিবলৈও দাবী জনায় । তেওঁ কয় যে অসমত প্রায় চল্লিশ লাখতকৈও অধিক জনসংখ্যা থকা অনুসূচিত জাতিৰ লোকসকলৰ আজিও প্রকৃতাৰ্থত সামগ্রিক উন্নয়ন আৰু কল্যাণ সাধন হোৱা নাই । চৰকাৰী আঁচনিয়েও সঠিকভাৱে অনুসূচিত জাতিৰ লোকসকলক অজ্ঞাত কাৰণত আজিও ঢুকি নাপালে । সেয়েহে, অসমৰ অনুসূচিত জাতিৰ লোকসকলৰ বাবে এখন স্বায়ত্তশাসিত পৰিষদ গঠন কৰিবলৈ দাবী জনোৱা বুলি কয় । চৰকাৰে এই দাবী সমূহ পূৰণ নকৰিলে অনাগত সময়ত জংগী আন্দোলনৰ সূচনা কৰা হ'ব বুলিও কয় ।
সমাগত লোকসভা নিৰ্বাচনৰ পূৰ্বে শাসকীয় দলৰ প্ৰাৰ্থী,নেতা-পালি নেতাক অনুসূচিত জাতি অধ্যূষিত অঞ্চলত প্ৰৱেশ কৰিবলৈ দিয়া নহ'ব বুলিও পৰিষদৰ নেতৃত্বই হুংকাৰ দিয়ে । ধৰ্মঘটৰ অন্তত আয়ুক্তৰ জৰিয়তে মুখ্যমন্ত্ৰী ড৹হিমন্ত বিশ্ব শৰ্মালৈ তেওঁলোকে এখন স্মাৰক পত্ৰ প্ৰেৰণ কৰে । এই অৱস্থান ধৰ্মঘট কাৰ্যসূচীত পৰিষদৰ কেন্দ্রীয় সহকাৰী সম্পাদক ক্ষীৰেণ দাস, লখিমপুৰ জিলা সমিতিৰ সভাপতি ৰমণী কুমাৰ দাস, সম্পাদক ৰজনীকান্ত দাসসহ একাংশ সদস্যই অংশগ্রহণ কৰে ।
লগতে পঢ়ক:ন্যায্য প্ৰাপ্তিৰ দাবীত গোলাঘাটত অনুসূচিত জাতি যুৱ-ছাত্ৰ পৰিষদৰ প্ৰতিবাদ
