কোকৰাঝাৰ, 24 এপ্ৰিল :ৰাজ্যৰ তৃতীয় পৰ্য্যায়ত শান্তিপূৰ্ণভাৱে অন্ত পৰে কোকৰাঝাৰ লোকসভা সমষ্টিৰ ভোটগ্ৰহণ ৷ মঙলবাৰে শান্তিপূৰ্ণভাৱে 83.2 শতাংশ ভোটৰে ৰাইজে নিৰ্ভয়ে ভোটাধিকাৰ সাব্যস্ত কৰে ৷ সমষ্টিৰ ভোটগণনাৰ ফলাফলৰ আগে পিছে ব্যাপক হিংসাত্মক ঘটনা সংঘটিত হোৱাৰ আশংকা কৰিছে সচেতন নাগৰিকে ৷
বহু চৰ্চিত কোকৰাঝাৰ লোকসভা সমষ্টিত প্ৰতিদ্বন্দিতা আগবঢ়াইছিল ন গৰাকী প্ৰাৰ্থীয়ে ৷ ইয়াৰে অৱতীৰ্ণ তিনি গৰাকী প্ৰাৰ্থী ক্ৰমে বিপিএফৰ প্ৰমিলা ৰাণী ব্ৰক্ষ্ম,ইউপিপিএলৰ উৰ্খাও গৌড়া ব্ৰহ্ম আৰু অবড়ো সমৰ্থিত নিৰ্দলীয় প্ৰাথী নৱ কুমাৰ শৰণীয়াৰ যুজঁ আছিল আত্মসন্মান আৰু প্ৰত্যাহ্বানৰ যুজঁ ৷ যাৰ পৰিপ্ৰেক্ষিতত কোকৰাঝাৰ লোকসভা সমষ্টিত জয় পৰাজয়ৰ অংকত ভোটগণনাৰ আগে পিছে ব্যাপক হিংসাত্মক ঘটনা সংঘটিত হোৱাৰ সম্ভৱনাই দেখা দিছে ৷ মঙলবাৰে কোকৰাঝাৰ চহৰত এচাম দুষ্কৃতিকাৰীয়ে খেদি খেদি ইউপিপিএল দলৰ তিনিজন সমৰ্থকক আক্ৰমণ কৰি চিকিৎসাধীন কৰা ঘটনাৰ পাচতে উত্তেজিত হৈ পৰিছে সমগ্ৰ কোকৰাঝাৰ চহৰ ৷
যাৰ পৰিপ্ৰেক্ষিতত অহা 23 মে ভোটগনণাৰ আগে পিছে বিটিএডিত পুনৰ কোনো দুষ্ট চক্ৰই বাতাবৰণ অশান্ত কৰি তোলাৰ সম্ভৱনাই গা কৰি তোলাৰ চিন্তাৰ উদ্ৰেগ ঘটাইছে বিভিন্ন মহলত ৷ আনহাতে কোকৰাঝাৰ পূৱ বিধানসভা সমষ্টিৰ 245 টা ভোট কেন্দ্ৰৰ ই ভি এমৰ বাকচ সমূহ যোৱাকালি মাজনিশা পৰা যথাস্থানত সুকলমে আহি পোৱাত বুধবাৰে পুৱা 4-15 বজাত ৰিটানিং বিষয়া পাৰ্থ প্ৰতীম মজুমদাৰৰ নেতৃত্বত আৰক্ষী বিষয়া আৰু আন সকলো ৰাজনৈতিক দলৰ উপস্থিতিত কটকটীয়া নিৰাপত্তাৰ বেষ্টনীত ইভিএমসমূহ ষ্ট্ৰং ৰূমত ছীল কৰি দিয়ে ৷
বুধবাৰে কোকৰাঝাৰ লোকসভা সমষ্টিৰ ৰিটাৰ্নিং বিষয়াৰ চূড়ান্ত প্ৰতিবেদন মৰ্মে ভোট দানৰ হাৰ কোকৰাঝাৰ (পূৱ) 82.2 শতাংশ ,কোকৰাঝাৰ পশ্চিম 82 .66, গোসাইগাঁও82.2 শতাংশ ৷
