কোকৰাঝাৰ, ২৭ ডিচেম্বৰ : কোকৰাঝাৰত বুধবাৰৰ পৰা তিনিদিনীয়া কাৰ্যসূচীৰে আৰম্ভ হৈছে সদৌ অসম নাথ যোগী ছাত্ৰ সন্থাৰ দ্বিতীয়তম কেন্দ্ৰীয় ত্ৰিবাৰ্ষিক অধিৱেশন । কোকৰাঝাৰ সদৰ চহৰৰ নাতিদূৰৈৰ ভূটীয়াপাৰা ৰাজহুৱা খেলপথাৰত অনুষ্ঠিত হৈছে সদৌ অসম নাথ যোগী ছাত্ৰ সন্থাৰ দ্বিতীয়তম ত্ৰিবাৰ্ষিক অধিৱেশনখন । তিনিদিনীয়া বৰ্ণাঢ্য কাৰ্যসূচীৰে আৰম্ভ হোৱা অধিৱেশনৰ আজি প্ৰথম দিনাখনেই অধিৱেশনথলীত উখল-মাখল পৰিৱেশ বিৰাজ কৰিছে ।
সদৌ অসম নাথ যোগী ছাত্ৰ সন্থাৰ দ্বিতীয়তম কেন্দ্ৰীয় ত্ৰিবাৰ্ষিক অধিৱেশনক লৈ ব্যস্ত হৈ পৰিছে জীয়ৰী-বোৱাৰী, ডেকা-গাভৰু সকলো । অধিৱেশনৰ প্ৰথম দিনৰ কাৰ্যসূচী অনুসৰি মুখ্য তোৰণ উদ্বোধন কৰে বিশিষ্ট সমাজসেৱক মুৰুলীধৰ মেধিয়ে । সংগঠনৰ পতাকা উত্তোলন কৰে নাথ ছাত্ৰ সন্থাৰ কেন্দ্ৰীয় সভাপতি লক্ষণ নাথে৷ সাংস্কৃতিক পতাকা উত্তোলন কৰে অভ্যৰ্থনা সমিতিৰ সভাপতি তথা বিধায়ক লৰেন্স ইছলাৰীয়ে ৷ শ্বহীদ তৰ্পন কৰে সংগঠনটোৰ কেন্দ্ৰীয় সাধাৰণ সম্পাদক অৰবিন্দ নাথে । ইয়াৰ পিছতে যোগী গুৰু গৰোক্ষ নাথৰ প্ৰতিচ্ছবিত মাল্যাৰ্পণ আগবঢ়াই বেদ ব্যৱস্থাপক দ্বিজেন গোস্বামীয়ে আৰু বৃক্ষ ৰোপণ কাৰ্যসূচীৰ শুভাৰম্ভ কৰে অভ্যৰ্থনা সমিতিৰ সম্পাদক ধনঞ্জয় নাথে ৷
দুপৰীয়া ১২ বজাত প্ৰতিনিধি শিবিৰ মুকলি কৰে অভ্যৰ্থনা সমিতিৰ কাৰ্যকৰী সভাপতি বকুল নাথে আৰু বিয়লি ২ বজাৰ পৰা নাথ যোগী কৃষ্টি-সংস্কৃতি সমাৰোহ অনুষ্ঠিত হয় ৷ ইপিনে অধিৱেশনৰ প্ৰথম দিনাৰ কাৰ্যসূচীত অংশগ্ৰহণ কৰা নাথ যোগী ছাত্ৰ সন্থাৰ সাধাৰণ সম্পাদক অৰবিন্দ নাথে সংবাদমাধ্যমৰ আগত কয়- ‘নাথ যোগী জনগোষ্ঠীটোৰ কাৰণে এই অধিৱেশনখন ঐতিহাসিক হিচাপে চিহ্নিত হৈ ৰ’ব । জনগোষ্ঠীটোৰ উন্নয়নৰ স্বাৰ্থত চৰকাৰৰ সৈতে অনুষ্ঠিত হোৱা আলাপ-আলোচনাৰ প্ৰতিশ্ৰুতি ৰূপায়ণ নহ’ল । ইয়াৰ প্ৰতিফলন ২০২৪ চনৰ নিৰ্বাচনত দেখিবলৈ পাব’ ।
এই অধিৱেশনত জনগোষ্ঠীটোৰ শৈক্ষিক, ৰাজনৈতিক অধিকাৰৰ পৰা আৰম্ভ কৰি কেইবাটাও গুৰুত্বপূৰ্ণ সিদ্ধান্ত লোৱা হ’ব বুলি নাথ যোগী ছাত্ৰ সন্থাৰ কেন্দ্ৰীয় সম্পাদক অৰবিন্দ নাথে মন্তব্য কৰিছে । উল্লেখ্য যে, নাথ যোগী ছাত্ৰ সন্থাৰ কেন্দ্ৰীয় অধিৱেশনত অসমৰ উপৰিও উত্তৰ প্ৰদেশ, মধ্যপ্ৰদেশ, ৰাজস্থানকে ধৰি দেশৰ বিভিন্ন প্ৰান্তৰ পৰা তিনি হেজাৰ প্ৰতিনিধিয়ে অংশগ্ৰহণ কৰিছে ৷ উল্লেখ্য যে, সদৌ অসম নাথ যোগী ছাত্ৰ সন্থাৰ দ্বিতীয় সংখ্যক ত্ৰিবাৰ্ষিক অধিৱেশনক লৈ আজিৰে পৰাই উখল-মাখল পৰিৱেশৰ সৃষ্টি হৈছে । অসমসহ দেশৰ বিভিন্ন প্ৰান্তৰ পৰা অহা আলহী-প্ৰতিনিধিক আপ্যায়নৰ বাবে খেলপথাৰতে নিৰ্মাণ কৰা নাথ যোগী গাঁৱৰ বাকৰিত গাঁৱৰ জীয়ৰী-বোৱাৰীয়ে পিঠাগুৰী খুন্দিছে আৰু বিভিন্ন ধৰণৰ পিঠা বনোৱা পৰিলক্ষিত হৈছে । তদুপৰি ৭০০০ নাথ যোগী নাচনীৰ দ্বাৰা নাথ-যোগী কৃষ্টি প্ৰদৰ্শনৰ আখৰা চলিছে উদযাপনথলীত ।
লগতে পঢ়ক : বিটিআৰত ৫৩১ গৰাকী অংগনবাড়ী কৰ্মী আৰু সহায়িকাক নিযুক্তি পত্ৰ বিতৰণ
