কোকৰাঝাৰ, 5 অক্টোবৰ : কোকৰাঝাৰ জিলাৰ পাঁচটা উন্নয়ন খণ্ডৰ অধীনত থকা মহিলা আত্মাসহায়ক গোট সমূহৰ মাজত সজাগতা বৃদ্ধি কৰাৰ লগতে উৎপাদিত সামগ্ৰীৰ বাবে এখন মুকলি বজাৰ গঢ়াৰ লক্ষ্যৰে কোকৰাঝাৰ চহৰত শনিবাৰৰ পৰা আৰম্ভ হৈছে তিনিদিনীয়া কাৰ্যসূচীৰে 'আত্মসহায়ক গোটৰ প্ৰদৰ্শনী'। এই উপলক্ষে জিলাখনৰ বিভিন্ন প্ৰান্তৰ পৰা অংশগ্ৰহণ কৰিবলৈ অহা আত্মসহায়ক গোটৰ প্ৰদৰ্শনী অনুষ্ঠানটোৰ শুভাৰম্ভ কৰে কোকৰাঝাৰ জিলাৰ উপায়ুক্ত পাৰ্থ প্ৰতিম মজুমদাৰে । জিলাখনৰ পাঁচটা উন্নয়ন খণ্ডৰ পৰা অনুষ্ঠানটোত অংশগ্ৰহণৰ বাবে অহা আত্মসহায়ক গোটসমূহৰ 40 খন বিপণী প্ৰদৰ্শনীত দেখা যায় ।
অনুষ্ঠানটোৰ আজিৰ মুকলি সভাত সভাৰ উদ্দেশ্য ব্যাখ্যা কৰে ডিআৰডিএৰ প্ৰকল্প প্ৰৱন্ধক ভাস্কৰ্যয়তী মহন্তই । মহন্তই বিশেষকৈ মহিলা আত্মসহায়ক গোটবোৰক চৰকাৰী সা-সুবিধাৰে সজাগতা অনাৰ এটা প্ৰয়াস চলোৱা হৈছে বুলি উল্লেখ কৰে । লগতে তেওঁ আত্মসহায়ক গোটসমূহক অৱগত কৰে যে, স্বাৱলম্বিতাৰ বাবে চৰকাৰে থলুৱা উদ্যোগ নিৰ্মাণৰ ক্ষেত্ৰত বহু আঁচনি আনিছে । উক্ত প্রদর্শনীত মহিলা আত্মসহায়ক গোটসমূহে নিজ নিজ থলুৱা পদ্ধতিৰে নিৰ্মাণ কৰি উলিওৱা সামগ্ৰীবোৰ প্ৰদৰ্শন কৰে । উল্লেখযোগ্য যে, কোকৰাঝাৰ জিলাত এতিয়ালৈ 75 আত্মসহায়ক গোট গঠন কৰা হৈছে আৰু সকলোবোৰ গোটে সক্ৰিয়ভাৱে কাম কৰি আছে ৷
