কোকৰাঝাৰ, 7 ছেপ্টেম্বৰঃ বৃহস্পতিবাৰে কোকৰাঝাৰ আৰক্ষীয়ে গৰুৰ চোৰাং ব্যৱসায়ৰ স'তে জড়িত থকাৰ অভিযোগত 'অল ইণ্ডিয়া লাইভষ্টক ট্ৰেডাৰ এণ্ড ট্ৰেন্সপৰ্টাৰ এচোচিয়েচন'ৰ সভাপতি আৰু সম্পাদকক গ্ৰেপ্তাৰ কৰে৷শুকুৰবাৰে কোকৰাঝাৰ আৰক্ষী অধীক্ষকৰ কাৰ্যালয়ত অনুষ্ঠিত হোৱা এক সংবাদমেলত জিলা আৰক্ষী অধীক্ষক ৰাজেন সিঙে এই কথা সদৰি কৰে ৷
সংবাদমেলখনত তেওঁ কয় যে বৃহস্পতিবাৰে মাজনিশা কোকৰাঝাৰ আৰক্ষীয়ে এক বিশেষ সূত্ৰৰ পম খেদি অসম বংগ সীমান্তৰ 31 নং ৰাষ্ট্ৰীয় ঘাইপথ তথা শ্ৰীৰামপুৰত তালাচী চলাই পশ্চিমবংগৰ পৰা অসম অভিমুখী এখন AS-01GC-3837 নম্বৰৰ ট্ৰাক জব্দ কৰে৷ জব্দকৃত ট্ৰাকখনেদি 16 টা বলধ গৰু অবৈধভাৱে কঢ়িয়াই অনা হৈছিল আৰু উক্ত ট্ৰাকখনক AS-01AK-7363 নম্বৰৰ এখন ইনোভা গাড়ীৰে "অল ইণ্ডিয়া লাইভষ্টক ট্ৰেডাৰ এণ্ড ট্ৰেন্সপৰ্টাৰ এচোচিয়েচনৰ" সভাপতি আৰু সম্পাদক ক্ৰমে অৰুণ লিংডো আৰু মুন্না শইকীয়া ওৰফে ইক্ৰাম হুছেইনে নিৰাপত্তা দি আনিছিল৷ আৰক্ষীয়ে ট্ৰাক আৰু চোৰাংভাৱে সৰবৰাহ কৰা 16 টা গৰু জব্দ কৰাৰ পিচতে অৰুণ লিংডো আৰু মুন্না শইকীয়াই ঘটনাস্থলীৰ পৰা পলায়ন কৰিবলৈ চেষ্টা কৰিছিল যদিও আৰক্ষীয়ে তেওঁলোকক আটক কৰিবলৈ সক্ষম হয়৷লগতে তেওঁ কয় যে অসম আৰু মেঘালয়ৰ মাজেৰে বাংলাদেশলৈ চোৰাংভাৱে গৰু চালান দিব বিচৰা উক্ত দলটোৰ আন আঠজন সদস্যক আৰক্ষীয়ে আটক কৰিছে য'ত এগৰাকী পশু চিকিৎসকো আছে৷ তদুপৰি আৰক্ষীয়ে দলটোৰ পৰা WB-70L-8539 নম্বৰৰ আন এখন মাৰুতী এল্টো গাড়ী জব্দ কৰে বুলি আৰক্ষীয়ে জানিবলৈ দিয়ে ৷ ইতিমধ্যে ঘটনা সন্দৰ্ভত আৰক্ষীয়ে গোসাইগাঁও থানাত এক গোচৰ ৰুজু কৰিছে ৷ উল্লেখ্য যে কোকৰাঝাৰ আৰক্ষী অধীক্ষক ৰাজেন সিঙে সদৰি কৰা মতে গৰুৰ অবৈধ চিণ্ডিকেট আৰু অবৈধ সৰবৰাহৰ বিৰুদ্ধে বিগত 2016 চনৰে পৰা কোকৰাঝাৰ আৰক্ষীয়ে নিৰৱিচ্ছিন্নভাৱে কাম কৰি আহিছে ৷ আৰু বিগত চাৰিটা বৰ্ষত কোকৰাঝাৰ আৰক্ষীয়ে গৰুৰ চোৰাং সৰবৰাহক লৈ 54 টা গোচৰ ৰুজু কৰিছে ৷ ইয়াৰোপৰিও তেওঁলোকে এই সন্দৰ্ভত 25 খন বাহন আৰু 1238 টা গৰু জব্দ কৰাৰ লগতে 162 জন গৰুৰ চোৰাং সৰবৰাহকাৰীক আটক কৰিছে ।
