কোকৰাঝাৰ, ১৪ আগষ্ট: ভাৰতবর্ষৰ গৌৰৱোজ্জ্বল ৭৫ সংখ্যক স্বাধীনতা দিৱসৰ সতে সংগতি ৰাখি ৰাষ্ট্ৰজুৰি পালিত হোৱা স্বাধীনতাৰ অমৃত মহোৎসৱৰ ‘হৰ ঘৰ ত্ৰিৰংগা’ কাৰ্যসূচীৰ অংশস্বৰূপে ৰবিবাৰে বিয়লি বিটিআৰ চৰকাৰৰ উদ্যোগত কোকৰাঝাৰত বিশাল পদযাত্ৰা বাহিৰ কৰা হয় (Rally of Har Ghra Triranga in Kokrajhar)। বিটিআৰ সচিবালয়ৰ মুখ্যদ্বাৰৰ পৰা উলিওৱা বিশাল পদযাত্ৰাৰ পতাকা জোকাৰি শুভাৰম্ভ কৰে বিটিআৰৰ মুখ্য কাৰ্যবাহী প্ৰমোদ বড়োই(BTR chief Pramod Boro)৷
বিভিন্ন শ্ৰেণীৰ সহস্ৰাধিক লোকৰ অংশগ্ৰহণৰে বাহিৰ হোৱা পদযাত্ৰাই বন্দে মাতৰম, ভাৰত মাতা কি জয় আদি দেশভক্তিমূলক শ্ল’গানেৰে বিটিআৰৰ সদৰ চহৰ কোকৰাঝাৰৰ আকাশ বতাহ মুখৰিত কৰি তোলে ৷ এনেদৰে চহৰখনৰ বিভিন্ন পথত পদযাত্ৰা কৰাৰ পিছত কোকৰাঝাৰ ক্ৰীড়া সন্থাৰ খেল পথাৰত পদযাত্ৰাৰ সামৰণি পৰে ৷ ইপিনে পদযাত্ৰাত অংশগ্ৰহণ কৰা বিটিআৰৰ মুখ্য কাৰ্যবাহী প্ৰমোদ বড়োই স্বাধীনতাৰ অমৃত মহোৎসৱৰ ‘হৰ ঘৰ ত্ৰিৰংগা’ কাৰ্যসূচীৰ জৰিয়তে ঐক্য আৰু সংহতি সুদৃঢ় হোৱাৰ লগতে দেশমাতৃৰ প্ৰতি সেৱাৰ মনোভাৱ বৃদ্ধি পাব বুলি সদৰী কৰিছে ।
