কোকৰাঝাৰ 8 আগষ্ট : কোকৰাঝাৰ জিলাৰ ভাৰত-ভূটান সীমান্তৱৰ্তী ঝাৰবাৰীত দেওবাৰে পুনৰ উপস্থিত হ'ল এনএলএফবি(NLFB)ৰ 32 জনীয়া এটা দল । ঘন জংঘলৰ পৰা অস্ত্ৰ-শস্ত্ৰ সহিতে উপস্থিত হয় দলটো । প্লাটুন কামাণ্ডাৰ বি হৰফাৰ নেতৃত্বত মূলসূঁতিলৈ অহা দলটোত এনএলএফবিৰ 32 জন সদস্য আছে । বৰ্তমানলৈকে সৰ্বমুঠ 55 জন এনএলএফবিৰ মুলসূঁতিলৈ আহিল ৷
অহা 15 আগষ্টৰ পূৰ্বে তথা পৰৱৰ্তী পৰ্যায়ত পুনৰ আন সদস্যসকল মূল সূঁতিলৈ আহিব বুলি মন্তব্য কৰিছে এনএলএফবিৰ শীৰ্ষ নেতা এম বাথাই । এন এল এফ বি সদস্যসকল মুলসূঁতিলৈ ঘূৰি অহাৰ পিছত স্থানীয় ৰাইজে এনএলএফবি জিন্দাবাদ ধ্বনি দি আদৰণি জনায় । যোৱা 22 জুলাইত ওদালগুৰিত 23 গৰাকী সদস্য মূলসঁতিলৈ অহাৰ পিছত দেওবাৰে পুনৰাই ভাৰত ভূটান সীমান্তৰ ঘন জংঘলৰ পৰা 32 গৰাকী এনএলএফবি সদস্য ৷
কিছুদিন পূৰ্বে এনএলএফবি (NLFB) ৰ মুৰব্বী এম বাথাই সদলবলে ওদালগুৰিত আত্মসমৰ্পন কৰাৰ পিছতে সাক্ষাৎ কৰে মুখ্যমন্ত্ৰী ড৹ হিমন্তবিশ্ব শৰ্মাক । অসম প্ৰশাসনিক পদাধিকাৰী মহাবিদ্যালয়ত মুখ্যমন্ত্ৰীক সাক্ষাতৰ পাছতে তাৎপৰ্যপূৰ্ণভাৱে উগ্ৰপন্থী নেতাজনে মন্তব্য কৰে যে, তেওঁলোকে আত্মসমৰ্পন কৰা নাই, যুদ্ধবিৰতিহে ঘোষণা কৰিছে । উল্লেখযোগ্য যে, বিদ্ৰোহী সংগঠন নেশ্যনেল লিবাৰেশ্য়ন ফ্ৰণ্ট অৱ বড়োলেণ্ড চমুকৈ NLFBৰ মুৰব্বী এম বাথা(M Batha)ই বৃহস্পতিবাৰে ওদালগুৰি জিলাৰ মাজবাটৰ অসম-অৰুণাচল সীমান্তৱৰ্তী চিকাৰীডাঙত আত্মসমৰ্পণ (Surrender) কৰে ।
বাথাৰ সৈতে একেলগে 22 জন কেডাৰেও অসম আৰক্ষীৰ সন্মুখত আত্মসমৰ্পণ কৰিছিল ৷ আত্মসমৰ্পণকাৰী সকলৰ ভিতৰত অন্যতম কেডাৰ হৈছে দুৰ্ধৰ্ষ নেতা বি বকো ৷ ভাৰত-ভূটানৰ সীমান্তৰে অৰুণাচল প্ৰদেশৰ পৰা চিকাৰীডাঙত উপস্থিত হয় আত্মসমৰ্পণ কৰা এই 23 জন NLFB কেডাৰ ৷ আত্মসমৰ্পণ অনুষ্ঠানত উপস্থিত থাকে অসম আৰক্ষী (Assam Police)ৰ শীৰ্ষ বিষয়া, বিশেষ আৰক্ষী সঞ্চালক প্ৰধান জি পি সিং (G P Singh), বিধায়ক জয়ন্ত মল্ল বৰুৱা (Jayanta Malla Baruah), মন্ত্ৰী পীযুষ হাজৰিকা (Pijush Hazarika) আৰু বিটিআৰ (BTR) চৰকাৰৰ শীৰ্ষ নেতৃত্ব ৷
লগতে পঢ়ক : ক'ভিডত আক্ৰান্ত মন্ত্ৰী অতুল বৰাক জি এম চি এইচত ভৰ্তি
