কোকৰাঝাৰ, 11 চেপ্তেম্বৰ: পশুপালনেৰে স্বাৱলম্বীতাৰ নিদৰ্শন দেখুৱাইছে কোকৰাঝাৰৰ এজন যুৱকে৷ যি সময়ত কৰ্মসংস্থাপনৰ বাবে ৰাজ্যৰ হাজাৰ হাজাৰ নিবনুৱা যুৱক বহিঃৰাজ্যলৈ গমন কৰিছে, সেই সময়তে এজন যুৱকে দেখুৱাইছে নিদৰ্শন।
চৰকাৰী চাকৰি বিচাৰি হাবাথুৰি নাখাই পশুপালন কৰি মাহত 45000 ৰ পৰা 50000 টকা পৰ্যন্ত উপাৰ্জন কৰে ৰাহুল নাৰ্জাৰী নামৰ এইজন যুৱকে৷
কোকৰাঝাৰ চহৰৰ পৰা প্ৰায় পাঁচ কি.মি. নিলগত থকা জানাগাঁৱৰ বাসিন্দা ৰাহুল নাৰ্জাৰী৷ শিক্ষিত যুৱকজনে পশুপালনৰ মাধ্যমেৰে কেৱল স্ব-নিৰ্ভৰশীল হোৱাই নহয় আন আন নিৱনুৱাসকলকো স্বাৱলম্বীতাৰ পথ দেখুৱাইছে৷ দুজন নিৱনুৱা যুৱকক নিজৰ ফাৰ্মত কৰ্মসংস্থাপনো দিছে ৰাহুল নাৰ্জাৰীয়ে৷
চৰকাৰী চাকৰি বা আঁচনিলৈ ৰৈ নাথাকি নিজকে স্বাৱলম্বী কৰাৰ সপোনৰে ২০১৭ৰ পৰা ৰাহুল নাৰ্জাৰীয়ে আৰম্ভ কৰিছিল এই ফাৰ্মখন৷ এতিয়া স্ব-নিৰ্ভৰশীল হোৱাৰ লগতে নতুন প্ৰজন্মকো পশুপালনেৰে স্বাৱলম্বীতাৰ পথ দেখুৱাবলৈ সক্ষম হৈছে ৰাহুল নাৰ্জাৰীয়ে৷
