কৰিমগঞ্জ , ২০ জুন : এটুপি বিশুদ্ধ খোৱাপানীৰ বাবে কৰিমগঞ্জত হাহাকাৰ কৰিবলগীয়া হৈছে কৰিমগঞ্জবাসীয়ে । এটা সময়ত কৰিমগঞ্জ জিলাত তিনিশৰো অধিক পানী যোগান আঁচনিৰে ৰাইজক যোগান ধৰা হৈছিল বিশুদ্ধ খোৱাপানী । আজিৰ তাৰিখতো পানী যোগান আঁচনিৰ সংখ্যা একেই আছে যদিও বিভাগীয় উদাসীনতাৰ ফলত জিলাখনত প্ৰায় পঞ্চাশ শতাংশ পানী যোগান আঁচনি বন্ধ হৈ পৰাৰ অভিযোগ উত্থাপিত হৈছে । যাৰ ফলত বিশুদ্ধ খোৱাপানীৰ পৰা বঞ্চিত হ’ব লগীয়া হৈছে সাধাৰণ জনতা ।
উল্লেখ্য যে, চহৰ অঞ্চল সমূহত পানী যোগান অব্যাহত থকাৰ বিপৰীতে গাঁৱৰ যি সমূহ পানী যোগান আঁচনি আছিল ইয়াৰ প্ৰায় অধিকাংশই বন্ধ হৈ পৰিছে । যাৰ ফলত ৰাইজে পুখুৰী, নলা অথবা নাদৰ গেলা পানী খাই জীৱন অতিবাহিত কৰিব লগীয়া হৈছে । জিলাখনৰ পাঁচটা বিধানসভা সমষ্টিতে অনুৰূপ পৰিৱেশ দেখিবলৈ পোৱা গৈছে । ৰাইজে জনোৱা অনুসৰি বহু এলেকাত আৰ্চেনিক আৰু আয়ৰনৰ মাত্ৰা অধিক পৰিমাণে থকাৰ বাবে এইবোৰ এলেকাত টিউবৱেলৰ চৰকাৰীভাৱে যোগান ধৰা নহয় । আৰু এনে এলেকা সমূহত বিভিন্ন সময়ত বিভিন্ন ৰোগে দেখা দিয়ে । কৰিমগঞ্জ জিলাখনত বিশুদ্ধ খোৱাপানীৰ যোগান ধৰাত সম্পূৰ্ণ ব্যৰ্থ হৈছে জনস্বাস্থ্য কাৰিকৰী বিভাগ । ডিজিটেল ইণ্ডিয়াৰ এইখন অসমৰ কৰিমগঞ্জ জিলাৰ লোক সকলে আজিৰ তাৰিখতো এটুপি বিশুদ্ধ খোৱাপানীৰ বাবে হাহাকাৰ কৰিব লগীয়া হৈছে ।
