কৰিমগঞ্জ, 2 অক্টোবৰঃ দুৰ্গা পূজাৰ প্ৰাক মুহূৰ্তত কৰিমগঞ্জৰ হাতিখীৰা চাহ বাগিচাত হাহাকাৰ পৰিস্থিতি ৷ যোৱা 26 ছেপ্টেম্বৰৰ তাৰিখে কৰিমগঞ্জ জিলাৰ পাথাৰকান্দি বিধানসভা সমষ্টিৰ অন্তৰ্গত হাতিখীৰা চাহ বাগিচাত কোনো জাননী নিদিয়াকৈ তলা ওলমাই পলায়ন কৰে বাগিচা খনৰ পৰিচালক শুভ্ৰ প্ৰকাশ নায়কে ৷ যি সময়ত সমগ্ৰ ৰাজ্যতে 20% পূজাৰ ব'নাচৰ বাবে চাহ শ্ৰমিক সকলে প্ৰতিবাদ কৰি আছে তেনে সময়তে পূজাৰ ব'নাচ নিদিয়াকৈ বাগিচা খনৰ পৰিচালকে পলায়ন কৰাত শ্ৰমিকৰ মাজত সৃষ্টি হৈছে হাহাকাৰ পৰিস্থিতিৰ ৷
উল্লেখ্য যে, পৰিচালকজনে পলায়ন কৰাৰ পাচতেই বাগিচা খনৰ শ্ৰমিক সকলৰ মাজত হাহাকাৰ পৰিস্থিতিৰ সৃষ্টি হয় ৷ পূজাৰ প্ৰাকক্ষণত কেৱল ব'নাচ বিচৰা বাবেই সুচাৰুৰূপে কাম সম্পাদনা চলি থকা বাগিচাখন বন্ধ হৈ যোৱাৰ বাবে শ্ৰমিক সকলৰ মাজত পূজাৰ আনন্দ সম্পূৰ্ণৰূপে ম্লান হৈ পৰিছে ৷ কেৱল পূজাৰ আনন্দই নহয়, ৰেচনৰ অভাৱত অনাহাৰে দিন পাৰ কৰিব লগীয়া হৈছে শ্ৰমিক সকলে ৷ যোৱা এসপ্তাহ ধৰি বন্ধ হৈ আছে বাগিচাখনৰ শ্ৰমিকৰ দৰমহা ৷ অভিযোগ অনুসৰি বহুবাৰ বাগানৰ মালিকৰ সৈতে ফোনত যোগাযোগ কৰিব বিচাৰিও বিফল হৈছে শ্ৰমিক সকল ৷ কাৰণ কোনোমতেই ফোন নুঠাই বাগিচাৰ মালিকে ৷ এনে অৱস্থাত অনাহাৰে থাকি দুশ্চিন্তাত হৃদক্ৰিয়া বন্ধ হৈ এগৰাকী স্থায়ী শ্ৰমিকৰ মৃত্যু হোৱাত বাগিচা খনত শোকৰ ছাঁ পৰিছে । মৃত শ্ৰমিকজন দেওৰাজ কৰ্মকাৰ বুলি জানিব পৰা গৈছে ৷ দুই কন্যা সন্তানৰ পিতৃ দেওৰাজৰ পত্নী এগৰাকী পক্ষাঘাত ৰোগী ৷
উল্লেখ্য যে, 26 ছেপ্টেম্বৰৰ নিশা শ্ৰমিক সকলক এসপ্তাহৰ মজুৰি, ৰেচন আৰু দুৰ্গা পূজাৰ বনাচ নিদিয়াকৈয়ে বাগিচা খনৰ পৰিচালক শুভ্ৰ প্ৰকাশ নায়কে পলায়ন কৰিছিল ৷ পাচদিনা অৰ্থাৎ 27 ছেপ্টেম্বৰত বাগিচাৰ এগৰাকী কৰ্মীৰ 'হোৱাট্ছএপ'ত বাগিচা খন বন্ধ কৰা হৈছে বুলি মেছেজ আহে ৷ আৰু ইয়াৰ পিচৰে পৰা বাগিচাখনৰ হেজাৰ হেজাৰ শ্ৰমিকে চৰম দুশ্চিন্তা আৰু অৰ্ধহাৰে-অনাহাৰে দিন কটাবলগীয়া হৈছে ৷
