কৰিমগঞ্জ, 24 এপ্ৰিল: 22 দিন ধৰি এটা ইটা ভাটাৰ কোঠাত আৱদ্ধ হৈ থকা সাত গৰাকী লোকক উদ্ধাৰ ৷ ধুবুৰী আৰক্ষী আৰু নিলামবজাৰ আৰক্ষীৰ সহযোগত কৰিমগঞ্জৰ কায়স্থগ্ৰামৰ ছলিড ইটা ভাটাৰ এটা কোঠাৰ পৰা শিশু, মহিলা আৰু শ্ৰমিক সহ মুঠ সাত গৰাকী লোকক উদ্ধাৰ কৰা হয় ৷
প্ৰাপ্ত তথ্য অনুসৰি উদ্ধাৰ হোৱা সাত গৰাকী লোকৰ ভিতৰত এজন পুৰুষ আৰু দুগৰাকী মহিলা ইটা ভাটাৰ শ্ৰমিক হিচাপে কৰ্মৰত আছিল ৷ উদ্ধাৰ হোৱা লোক কেইজন ছকিনা বিবি, ৰেহানা বিবি আৰু নুৰ জামাল বুলি জানিব পৰা গৈছে ৷ তেওঁলোকৰ সৈতে আৰক্ষীয়ে চাৰিটা শিশুকো উদ্ধাৰ কৰে ৷
অভিযোগ অনুসৰি বিগত 22 দিন ধৰি এটা কোঠাৰ ভিতৰত তেওঁলোকক আৱদ্ধ কৰি ৰখা হৈছিল ৷ ইটা ভাটাৰ মালিক আলা উদ্দিনৰ বিৰুদ্ধে শ্ৰমিক সকলক বন্দী কৰি ৰখাৰ অভিযোগ উত্থাপন হৈছে ৷ শ্ৰমিক কেইজনৰ চৰ্দাৰৰ লগত ইটা ভাটাটোৰ মালিকৰ আৰ্থিক লেনদেনৰ বাবে শ্ৰমিক কেইজনক আৱদ্ধ কৰি ৰখা বুলি সন্দেহ কৰা হৈছে ৷ উদ্ধাৰ হোৱা শ্ৰমিক কেইজন ধুবুৰী জিলাৰ গৌৰীপুৰ এলেকাৰ বুলি জানিব পৰা গৈছে ৷
লগতে পঢ়ক: কাছাৰৰ লায়লাপুৰত গুলীচালনা: আহত বনকৰ্মী
